حماس د اسرائيلي بنديانو خوشې کول پيل کړل، لومړۍ ډله اووه تنه يي په غزه کې سره صليب ته وسپارل
د فلسطين مقاومتي ډلې د اوربند تړون له مخې د دوشنبې په ورځ د خوشې کېدونکو ۲۰ اسرائيلي بنديانو نومونه هم خپاره کړل.
د اسرائيل ۱۲م چينل راپور ورکړی، چې د فلسطين مقاومتي ډلې حماس د اوربند تړون د یوې برخې په توګه، په غزه کې لومړي اووه اسرائيلي يرغمل شوي کسان سره صليب ته سپارلي دي. دا کار د دوشنبې په ورځ د دغې ډلې له خوا د اسرائيلي بنديانو د خوشې کولو پيل په ګوته کوي.
د راپور له مخې، ۱۳ اسرائيلي يرغمل شوي به د مرکزي غزې څخه د ګرینویچ پر وخت ۰۷:۰۰ بجې خوشې شي.
د اسرائيلو پوځ ويلي، چې د سره صليب د موټرو يو کاروان د حماس له خوا د خوشې کېدونکو اسرائيلي بنديانو د لومړۍ ډلې د راوړلو لپاره پر لاره و.
د ورځې په لومړیو کې، د حماس پوځي څانګې قسام لواګانو اعلان وکړ چې دوی پرېکړه کړې چې د غزې د اوربند او د بندیانو د تبادلې د هوکړې د یوې برخې په توګه ۲۰ ژوندي اسرائيلي بندیان خوشې کړي.
دغې ډلې د بنديانو نومونه خپاره کړي، چې په کې اېلکانا بوهبوټ، متان انګرېست، اويناتن اور، يوسف-حايم اوهانا، الون اوهل، اوياتار داوود، ګای ګيلبوا-دلال، روم براسلاوسکي او غبرګوني ګالي او زيو برمن، ايتان مور، سيګيو کالفون، ماکسيم هرکين، ايتان هورن، بار کوپرشټاين، عمري ميران، او وروڼه ډيوېډ کيونيو او اريل کيونيو شامل دي.
د اسرائيلي رسنيو په وينا، د بنديانو خوشې کول به په دوو پړاوونو کې ترسره شي.
دوهم پړاو به د سهار په ۱۰:۰۰ بجې د خان يونس له سيمې او د غزې د مرکزي کډوالو له کمپونو څخه ترسره شي.
د دوشنبې په ورځ، اسرائيليان پر فلسطيني سيمه د تل ابیب له دوه کلنې وحشيانه جګړې وروسته د يوې تاريخي اوربند د مهمې تبادلې په ترڅ کې له ورانې شوې غزې څخه د وروستيو ۲۰ ژونديو بنديانو هرکلي ته چمتووالی نيسي، فلسطينيان هم د اسرائيلو له خوا د نيول شويو سلګونو کسانو خوشې کېدو ته په تمه دي.
دا پرمختګ د غزې د اوربند په اړه د سولې له هغې سرمشريزې څو ساعته مخکې رامنځته شوی چې د مصر په شرم الشيخ ښارګوټي کې به جوړېږي، او ګډه مشري به يې د امريکا ولسمشر ډونالډ ټرمپ او د مصر ولسمشر عبدالفتاح السيسي کوي.
تمه ده چې په دې سرمشريزه کې به د نړۍ تر ۲۰ زيات هیوادودنو مشران ګډون وکړي، چې په کې د تورکيې ولسمشر رجب طيب اردوغان، د فرانسې ولسمشر ايمانويل مکرون، د اردن پاچا دوهم عبدالله، د بحرين پاچا حمد بن عيسی ال خليفه، د بريتانيا لومړی وزير کېر سټارمر، د اسپانيا لومړی وزير پېډرو سانچېز، د ايټاليا لومړۍ وزيره جورجيا ميلوني، د پاکستان لومړی وزير شهباز شريف او د جرمني لومړی وزير فرېدرېش مېرز شامل دي.
