د چهارشنبې په ورځ د لبنان په سویل کې په بېلابېلو برخو کې د اسرائیلو په تازه بریدونو کې لږ تر لږه ۹ کسان وژل شوي او په لسګونو نور ټپیان شوي دي. دا بریدونه پر ښارګوټو، لارو او د فلسطینیانو د کډوالو پر یوه کمپ په داسې حال کې شوي چې په سرحدي سیمو کې جګړه سخته شوې ده.
د لبنان د ملي خبري اژانس د راپور له مخې، په "حبوش"کې په یوه برید کې ۳ کسان وژل شوي او ۱۸ ټپیان دي، په داسې حال کې چې په "صور" ښار کې د یوې څلورلارې سره نږدې برید ۲۴ کسان ټپیان کړي دي.
لبناني چارواکو ویلي چې د "میه میه" د کډوالو په کمپ کې ۲ کسان او په عدلون کې ۴ نور کسان وژل شوي دي. اسرائیلي پوځ تر اوسه د دې بریدونو په اړه څه نه دي ویلي.
د حزب الله ځوابي بریدونه
ورته مهال، حزب الله ویلي چې پر اسرائیلي ځواکونو او نظامي مرکزونو یې یو لړ بریدونه کړي دي. دغې ډلې ویلي چې په "قوزه" سیمه کې یې یو اسرائیلي میرکاوا ټانک په لارښود شوي توغندي ویشتلی او وروسته یې هغه نظامي هیلیکوپټره هم په نښه کړې چې د مرګ ژوبلې د لیږد لپاره راغلې وه، چې له امله یې هیلیکوپټره شاتګ ته مجبوره شوه.
حزب الله همدارنګه ویلي چې د "شومېرا" په بارکونو کې یې پر اسرائیلي پوځیانو د بې پیلوټه الوتکو (ډرون) بریدونه کړي او د "یفتای" او "صفد ښار ته نږدې د "دادو" په اډه کې یې د اسرائیل د شمالي قوماندانۍ مرکزونه په توغندیو ویشتلي دي.
د ملکي تلفاتو زیاتوالی
اسرائیلو د مارچ میاشتې له پیل راهیسې، له حزب الله سره د سرحدي نښتو وروسته، په سویلي لبنان کې خپلو هوايي بریدونو او ځمکنیو عملیاتو ته زور ورکړی دی. لبناني چارواکي وايي چې د اسرائیلو د تیري له پیل راهیسې تر ۱۰۰۰ ډېر کسان وژل شوي او په زرګونو نور ټپیان دي، چې ډېری قربانیان یې ملکیان دي.
دا کړکېچ پر ایران د امریکا او اسرائیلو د بریدونو له امله د رامنځته شوي پراخ سیمه ییز صراع یوه برخه ده، چې په نورو برخو کې یې هم د جګړې د خپریدو ویره زیاته کړې ده.
