په بلجیم کې د یوې چاودنې له امله کنیسه (د یهودانو عبادت ځای) زیانمنه شوې. پولیس وایي څوک نه دي ټپیان شوي.
د بلجیم په لیج ښار کې د سهار وختي یوې چاودنې کنیسې ته زیان اړولی او د شاوخوا ودانیو کړکۍ یې ماتې کړې دي، چارواکي د پېښې لامل لټوي.
دا چاودنه د دوشنبې په ورځ سهار شاوخوا ۴:۰۰ بجې د کنیسې مخې ته شوې ده.
پولیسو ویلي چې د بلجیم په ختیځ، لیج ښار کې یوې چاودنې یوې کنیسې ته زیان اړولی او زیاته کړې یې ده چې هغوی د چاودنې د لامل په اړه څېړنې کوي.
د لیج ښار د پولیسو یوه ویاند په یوه اعلامیه کې ویلي چې په دې پېښه کې چاته زیان نه دی رسېدلی او "یوازې مالي زیان" اوښتی دی. ویاند زیاته کړه چې چاودنه د دوشنبې په ورځ د سهار په ۴:۰۰ بجو د کنیسې مخې ته شوې، چې له امله یې د سړک بلې غاړې ته د ودانیو کړکۍ هم ماتې شوې دي.
د فرانسوي ژبې عامه رسنۍ RTBF د راپور له مخې، په سیمه کې امنیتي کمربند جوړ شوی او تمه ده چې فدرالي پولیس هم سیمې ته ورسېږي.
د دې کنیسې د وېبپاڼې له مخې، دا ودانۍ په ۱۸۹۹ کال کې جوړه شوې او د لیج د یهودي ټولنې د تاریخي موزیم په توګه هم کارول کېږي.
