د امریکا ولسمشر څرګنده کړه چې له ایران سره د سولې هوکړه ښايي تر نظامي بریا هم ارزښتناکه وي. هغه دا یوه پېچلې پروسه وبلله چې یو لوی ځواک پکې ښکېل دی، چېرته چې ډیپلوماسي ستونزمنه خو احتمالا ډیره پایداره وي.

د امریکا ولسمشر ډونالډ ټرمپ ویلي چې دی به "په راتلونکې اونۍ کې" له ایران سره د اوربند د غځولو او د هرمز تنګي د بیا پرانیستلو په اړه یوې هوکړې ته ورسیږي.

هغه له ABC News سره په یوه ټیلیفوني مرکه کې وویل: "حالات ښه ښکاري، ښه ښکاري. نن یو کوچنی خنډ  رامنځته شو، مګر لکه څنګه چې تاسو شاید مخکې لیدلي وي، ما دا وضعیت خورا ګړندی بدل کړ."

هغه وویل دا "خنډ" له دې امله و چې ایرانیان په لبنان باندې د اسرائیلو له بریدونو څخه ناراضه وو. ټرمپ زیاته کړه: "نو ما له حزب الله سره خبرې وکړې او ورته مې وویل چې برید ونکړي، او ما له بي بي (د اسراییلو لومړی وزیر بنیامین نتنیاهو) سره هم خبرې وکړې او ورته مې وویل چې برید ونکړي؛ نو دواړو لورو پر یو بل ډزې بندې کړې."

ټرمپ وویل چې له ایران سره د سولې تړون حتی "تر یوې نظامي بریا هم غوره" کیدی شي. هغه وویل: "دا ساده کار نه دی. تاسو د یو واقعي لوی هیواد په اړه خبرې کوئ - هغوی - یو خورا لوی هیواد چې معامله ورسره کیږي. په حقیقت کې خورا ډیره دښمني شتون لري."

هغه زیاته کړه: "نو دا د هغوی لپاره اسانه کار نه دی. په اصل کې زموږ له نظره هم اسانه نه دی. خو موږ هغه څه ترلاسه کوو چې ورته اړتیا لرو."

د دې په اړه چې د اوربند د غځولو هوکړه او د تنګي د پرانیستلو لپاره د تفاهم یادښت به کله بشپړ او ومنل شي، ټرمپ وویل: "زه فکر کوم تاسو د راتلونکې اونۍ په اړه خبرې کوئ." هغه وویل چې تر اوسه یې ورسره موافقه نه ده کړې ځکه "زه لا هم باید یو څو نور ټکي ترلاسه کړم."

"بیروت ته ځواکونه نه ځي"

د دوشنبې په ورځ، لبنان وویل چې وروسته له هغه چې ټرمپ له حزب الله ډلې سره د یوې "خورا ښې اړیکې" راپور ورکړ، حزب الله پر اسرائیلو د بریدونو د بندولو په اړه د امریکا وړاندیز منلی، په دې شرط چې اسرائیل هم د بیروت په سویل بریدونه ودروي.

د دغه ترتیب له مخې، چې په واشنګټن کې د لبنان د سفارت په وینا حزب الله منلی دی، "پر ضاحیه (د بیروت سویلي څنډې) باندې د اسرائیلو بریدونه به ودرول شي او په بدل کې به یې حزب الله پر اسرائیلو له بریدونو ډډه کوي."

اسرائیلو ګواښ کړی و چې د دوشنبې په ورځ به یو ځل بیا د لبنان د پلازمینې سویلي څنډې په نښه کړي. په لبنان کې د اسرائیلو مخ په زیاتیدونکي کړکېچ، چې سخت بمبار او په تیرو دوو لسیزو کې ترټولو ژور ځمکنی یرغل پکې شامل دی، په پراخه منځني ختیځ کې د امریکا او ایران ترمنځ د اوربند د ګډوډولو ویره رامنځته کړې وه.

ټرمپ وویل چې ده اسرائیل او حزب الله قانع کړي چې کړکېچ کم کړي. ټرمپ د اسرائیلو له لومړي وزیر بنیامین نتنیاهو سره له یوې "خورا ګټورې" اړیکې وروسته په خپله شبکه 'ټروت سوشل' (Truth Social) کې ولیکل: "بیروت ته به هیڅ ځواکونه نه ځي، او هر هغه ځواکونه چې په لاره وو، لا دمخه بېرته ګرځول شوي دي."

هغه زیاته کړه: "همدارنګه، د لوړ پوړو استازو له لارې، ما له حزب الله سره خورا ښه اړیکه لرله، او هغوی موافقه وکړه چې ټولې ډزې به ودروي - دا چې اسراییل به پر هغوی برید نه کوي، او هغوی به پر اسراییلو برید نه کوي."