د خبري اژانسونو د راپور له مخې، د روسیې د امنیتي خدماتو ادارې له خوا په خپره شوې اعلامیه کې ویل شوي: «د روسیې د فدرالي امنیت ادارې د جرمني یو تبعه نیولی چې د اوکراین د وسله والو ځواکونو د موظفو سرتېرو له ډلې څخه دی.»

د  روسیې د امنیتي خدماتو ادارې د معلوماتو له مخې، دغه کس چې مخکې یې په افغانستان او سوریه کې هم جګړه کړې وه، تېر کال د نومبر په میاشت کې اوکراین ته تللی و او د اوکراین له پوځ سره یې د درېیو کلونو تړون لاسلیک کړی و، خو د ژمنه شویو حقوقو د نه ترلاسه کولو له امله له پوځ څخه تښتېدلی و.

دا جرمنی تبعه چې په ۱۹۷۶ کال کې زیږېدلی او د "نښه ویشتونکي (سنائپر)" په توګه پېژندل شوی، تر دې وړاندې هم د ۲۰۱۶ او ۲۰۱۸ کلونو ترمینځ په اوکراین کې په پوځي خدماتو بوخت و.

روسیې، چې د ۲۰۲۲ کال په فبرورۍ کې پر اوکراین پراخ پوځي یرغل پیل کړی، وخت په وخت له کیېف سره د همکارۍ په تور د بېلابېلو کسانو د نیول کېدو خبرونه خپروي.

دا نیونه دقیقاً یوه اونۍ وروسته له هغه رامنځته کیږي چې روسیې د یوه سویډني تبعه د نیولو خبر ورکړ او هغه یې هم د اوکراین په ګټه په جګړه تورن کړ.

د روسیې محکمو په تېرو څلورو کلونو کې په سلګونو کسان د "خاین"، "تخریبکار" او "جاسوس" په تور په اوږدمهاله حبس محکوم کړي دي.

دغه راز یو شمېر بهرني اتباع هم د اوکراین په ګټه د "مزدورۍ/شپږمې جګړې" د فعالیتونو په تور محکوم او زنداني شوي دي.