افغانستان وویل چې غواړي له پاکستان سره د ښه ګاونډیتوب پر بنسټ اړیکې ولري

د افغانستان د دفاع وزیر محمد یعقوب مجاهد ویلي، چې له وروستیو نښتو وروسته غواړي له پاکستان سره د ښه ګاونډیتوب پر بنسټ اړیکې ټینګې کړي.

مجاهد له الجزیرې سره په خبرو کې د افغانستان او پاکستان ترمنځ د کړکېچ په اړه څرګندونې وکړې.

هغه دې ته په اشارې چې دا کړکېچ د هېڅ لوري په ګټه نه دی، وویل: "افغانستان او پاکستان ګاونډي هېوادونه دي. د دوی ترمنځ کړکېچ د هېچا په ګټه نه دی."

مجاهد په دوحه کې شوې هوکړې ته په اشارې وویل، چې په تورکیه کې جوړېدونکې غونډه به د هوکړې د پلي کولو او څارنې پر میکانیزمونو خبرې وکړي.

هغه څرګنده کړه چې افغانستان د هوکړې ټولو مادو ته ژمن دی او ټینګار یې وکړ چې که پاکستان خپل مکلفیتونه پوره نه کړي، نو ستونزې به رامنځته شي.

مجاهد د منځګړو هېوادونو، تورکیې او قطر، څخه وغوښتل چې د کابل او اسلام اباد ترمنځ د هوکړې په پلي کولو کې مرسته وکړي.

هغه د افغانستان او پاکستان ترمنځ په وروستیو کړکېچونو کې د هند د رول په اړه ادعاوې هم رد کړې او ویې ویل:
"دا تورونه بې بنسټه دي. زموږ پالیسي دا نه ده چې خپله خاوره د نورو هېوادونو پر وړاندې وکاروو. موږ به له هند سره د یوه خپلواک ملت په توګه د خپلو ملي ګټو په چوکاټ کې اړیکې وساتو او پیاوړې به یې کړو. په ورته وخت کې به له پاکستان سره هم د ښه ګاونډیتوب پر بنسټ خپلې اړیکې وساتو. زموږ موخه د اړیکو ښه کول دي، نه د کړکېچ رامنځته کول. د پاکستان تورونه بې بنسټه، غیر منطقي او د نه منلو وړ دي."

د پاکستان او افغانستان ترمنځ کړکېچ
اسلام اباد د "پاکستاني طالبانو (TTP) تحریک سره د مبارزې" په چوکاټ کې د اکتوبر پر ۹مه پر کابل ځینې هوايي بریدونه وکړل.

د اکتوبر پر ۱۱مه افغان امنیتي ځواکونو په سرحدي سیمه کې د پاکستان پر پوستو په پراخو بریدونو ځواب ورکړ او نښتې وخت په وخت زیاتېدې.

د افغانستان ادارې د قطر او سعودي عربستان په منځګړیتوب د نښتو د درېدو اعلان وکړ. خو د اکتوبر پر ۱۴مه په پوله کې کړکېچ بیا زیات شو.

پاکستان اعلان وکړ چې د افغانستان د اوربند غوښتنې پر بنسټ یې د اکتوبر پر ۱۵مه د ۴۸ ساعتونو لپاره لنډمهاله اوربند اعلان کړی دی.

له افغان ادارې څخه د پاکستان غوښتنې
پاکستان په ۲۰۲۱ کال کې په افغانستان کې د طالبانو له واکمنېدو راهیسې له نوې ادارې غواړي چې د TTP په اړه اقدامات وکړي.

اسلام اباد وايي، TTP چې دوی یې "ترهګره ډله" بولي او په خاوره کې یې ګڼ بریدونه کړي، په افغانستان کې ځای پر ځای شوې او د کابل اداره د دې ډلې پر وړاندې کوم اقدام نه کوي.

خو افغان اداره بیا وايي چې TTP د دوی په خاوره کې فعالیت نه لري.

TTP د افغانستان او پاکستان ترمنځ د برتانوي استعمار پر مهال جوړې شوې ډیورنډ کرښې دواړو غاړو ته د پښتون مېشتو قبایلي سیمو څخه په فعاله توګه کار اخلي.