شمالي کوریا یو ځل بیا د ختیځ سمندر پر لور بالستیک توغندي توغولي دي. دا خبره سویلي کوریا کړې ده.
جنوبي کوریا او جاپان وايي چې شمالي کوریا د یکشنبې په ورځ له خپل ختیځ ساحل څخه یو بالستیک توغندی توغولی دی.
د جنوبي کوریا د پوځ په وینا، شمالي کوریا له خپل ختیځ ساحل څخه یو بالستیک توغندی توغولی دی.
پوځ وویل: "شمال (شمالي کوریا) د ختیځ سمندرګي پر لور یو ناپېژندل شوی بالستیک توغندی توغولی دی،" او هغو اوبو ته یې اشاره وکړه چې د جاپان سمندرګي په نوم هم یادېږي.
د جاپان دفاع وزارت هم ویلي چې یو احتمالي بالستیک توغندی یې کشف کړی، چې د دوی په وینا د ځايي وخت شاوخوا سهار ۸:۰۸ بجې په یوه ناڅرګند ځای کې لګېدلی دی.
شمالي کوریا وروستی ځل د نوامبر په میاشت کې د بالستیک توغندي ازموینه وروسته له هغې ترسره کړه، چې د امریکا ولسمشر ډونالډ ټرمپ د جنوبي کوریا له خوا د اټومي ځواک لرونکي اوبتل جوړولو پلان منظور کړ.
پیونګ یانګ په وروستیو کلونو کې د توغندیو ازموینې د پام وړ زیاتې کړې دي.
دا توغول د شمالي کوریا د واکمن ګوند له یوې تاریخي غونډې مخکې ترسره کېږي، چې تمه ده په راتلونکو اونیو کې جوړه شي.
دا به په پنځو کلونو کې لومړنۍ داسې غونډه وي، او تمه کېږي چې اقتصادي تګلاره او دفاعي پلانونه به په کې مهم ځای ولري.
دغې غونډې ته د چمتووالي په ترڅ کې، د شمالي کوریا مشر کیم جونګ اون د هېواد د توغندیو د تولید د پراخولو او عصري کولو او د اضافي فابریکو د جوړولو امر کړی، ترڅو هغه څه پوره کړي چې پیونګ یانګ یې مخ پر ودې غوښتنه بولي.
دولتي رسنیو د یکشنبې په ورځ راپور ورکړ چې کیم د تاکتیکي رهبري شویو وسلو د تولید له یوې فابریکې څخه لیدنه کړې ده.
د کوریا د مرکزي خبري اژانس په وینا، هغه د دې لیدنې پرمهال د اوسني تولیدي ظرفیت د ۲۵۰ سلنه پراخولو امر وکړ.
