ټرمپ ته د مادورو غبرګون: "د سي آی اې په ملاتړ کودتاګانې نه منو"
د وینزویلا ولسمشر نیکولاس مادورو د امریکا د ولسمشر ډونالډ ټرمپ هغې پرېکړې ته غبرګون وښود چې له مخې یې د مرکزي استخباراتو ادارې (سي آی اې) ته "له مخدره توکو سره د مبارزې" په پلمه د وینزویلا په خاوره کې د عملیاتو اجازه ورکړې ده، او ویې ویل چې دا په ښکاره توګه "د سي آی اې په ملاتړ کودتا ده." هغه وویل چې هیڅوخت به اجازه ورنکړي.
د دولتي ټلوېزیون VTV د خبر له مخې، مادورو په یوه غونډه کې په خپله وینا کې د ټرمپ څرګندونو ته غبرګون وښود.
مادورو په تېر کې په افغانستان، عراق او لیبیا کې د امریکا پوځي عملیاتو ته په اشارې سره وویل چې دا ډول سیاستونه له ناکامۍ سره مخ شوي دي.
مادورو وویل: "د رژیمونو بدلون ته نه. د سي آی اې په ملاتړ کودتاګانو ته نه، چې په ارجنټاین کې کودتاوې، په چیلي کې د (اګوستو) پینوشه کودتا، او هغه ۳۰ زره کسان چې د دې سازمان په لاس تري تم شول او ۵ زره نور چې ووژل شول یا تري تم شول، را په یادوي."
د امریکا ولسمشر ټرمپ د اکتوبر په ۱۴مه اعلان کړی و چې د وینزویلا سواحلو ته نږدې د مخدره توکو د قاچاق په تور پر یوې کښتۍ برید شوی او ۶ کسان په کې وژل شوي دي.
ټرمپ تایید کړې وه چې سي آی اې ته یې "له مخدره توکو سره د مبارزې" په پلمه د وینزویلا په خاوره کې د عملیاتو اجازه ورکړې ده.
په کارابین کې خوځښتونه
د امریکا ولسمشر ټرمپ پخوا د یوه فرمان په لاسلیک کولو سره د لاتینې امریکا د مخدره توکو له کارټلونو سره په خپله سیمه کې د مبارزې په پلمه د پوځ د ډېر او اغېزناک کارولو امر کړی و.
امریکا په دې لړ کې د اګست په وروستیو کې د وینزویلا سواحلو ته یو سمندري ځواک لېږلی و چې له یوې اوبتلې او جنګي بېړیو څخه جوړ و، او د امریکا دفاع وزیر پیټ هګسیټ هم ویلي وو چې د امریکا پوځ په وینزویلا کې د رژیم د بدلون په ګډون عملیاتو ته چمتو دی.
د وینزویلا ولسمشر نیکولاس مادورو هم په ځواب کې اعلان کړی و چې په هېواد کې یې ۴.۵ میلیونه ملیشه ځواکونه بسیج کړي او د هر ډول برید شنډولو ته چمتو دی.
له بلې خوا، د امریکا لخوا د وینزویلا سواحلو ته نږدې د "مخدره توکو د قاچاق" په پلمه پر ځینو کښتیو بریدونو ته دوام ورکولو هم د وینزویلا د حکومت او هم د نړیوالې ټولنې له نیوکو سره مخ شوی او دا بریدونه "له نړیوالو قوانینو څخه سرغړونه" بلل شوي دي.
