خو هغه د چهارشنبې په ورځ اشاره وکړه چې د زیلینسکي سره موافقې ته رسېدل لا هم ستونزمن دي، او زیاته یې کړه چې د اوکراین مشر سره معامله کول د پوتین په پرتله ډیره ګرانه خبره ده.
په همدې حال کې، زیلینسکي د امریکا هغه نیوکې رد کړې چې د کیف لخوا د روسیې د کریمیا د نیولو د رسمیت پېژندلو څخه انکار شوی دی.
د چهارشنبې په ورځ، ولسمشر ټرمپ د خپل ټروت سوشل پلیټ فارم کې په یوه پوسټ کې وویل چې د کریمیا په اړه د زیلینسکي سرې کرښې چې د روسیې سره په خبرو کې شاملې نه وي، د سولې روانو خبرو ته "ډېر زیان رسوي".
هغه وویل: "هیڅوک له زیلینسکي څخه نه غواړي چې کریمیا د روسیې د خاورې په توګه ومني. خو که هغه کریمیا غواړي، نو ولې یې یولس کاله مخکې د هغې لپاره جګړه ونه کړه کله چې پرته له جګړې او مقامته روسیې ته وسپارل شوه؟"
زیلینسکي په کیف کې یوې خبري غونډې ته وویل چې دا موضوع "د بحث وړ نده" ځکه چې دا د هېواد د اساسي قانون خلاف دی.
هغه په ایکس کې د ټرمپ د څرګندونو په ځواب کې وویل: "اوکراین به تل د خپل اساسي قانون سره سم عمل وکړي، او موږ په بشپړ ډول ډاډه یو چې زموږ شریکان، په ځانګړي ډول امریکا، به د خپلو قوي پرېکړو سره سم عمل وکړي."
د زیلینسکي پوسټ کې د کریمیا د اعلامیې عکس هم شامل و، چې په ۲۰۱۸ کال کې د هغه وخت د بهرنیو چارو وزیر مایک پومپیو لخوا خپور شوی و، چې پکې ویل شوي وو چې امریکا د ۲۰۱۴ کال د کریمیا د نیولو په اړه د روسیې اقدام ردوي او "ژمنه کوي چې دا پالیسي به تر هغه پورې وساتي چې د اوکراین ځمکنۍ بشپړتیا بیرته نه وي ترلاسه شوې."
د لندن خبرې
زیلینسکي د چهارشنبې په ورځ په لندن کې د سولې د خبرو په اړه د فرانسې او بریتانیا د هڅو په اړه تبصره وکړه، او ویې ویل چې کیف هیله لري چې دا ګډې هڅې به په هېواد کې د "دوامداره سولې" لامل شي.
هغه وویل: "نن احساسات ډېر لوړ وو. خو دا ښه ده چې پنځه هېوادونه د سولې د نږدې کولو لپاره سره راټول شول: اوکراین، امریکا، بریتانیا، فرانسه او جرمني."
هغه زیاته کړه: "لوري خپل نظرونه څرګند کړل او د یو بل دریځونه یې په درناوي سره واورېدل. دا مهمه ده چې هر لوری یوازې ګډون کوونکی نه و، بلکې په ماناداره توګه یې مرسته وکړه."
د اوکراین لومړي وزیر ډینیس شمیهال هم د چهارشنبې په ورځ وویل چې کیف د امریکا سره د اقتصادي مشارکت تړون نتیجې ته د رسولو ملاتړ کوي، په داسې حال کې چې د اوکراین د بیا رغونې لپاره د پانګونې صندوق د جوړولو په اړه "تخنیکي" خبرې پایته رسولو هڅه کوي.
هغه په ایکس کې وویل: "ما ټینګار وکړ چې د اوکراین حکومت د اقتصادي مشارکت تړون نتیجې ته رسولو او د بیا رغونې لپاره د پانګونې صندوق د جوړولو ملاتړ کوي." دا خبرې د امریکا د خزانې وزیر سکاټ بیسنټ سره په واشنګټن ډي سي کې شوې وې.
