سودان د دوشنبې په ورځ د چټک ملاتړ ځواکونه (RSF) په دې تورن کړ چې د پلازمېنې خرطوم لویدیځ کې یې له ۳۱ څخه زیات بې وسلې ملکي وګړي اعدام کړي دي.

د سودان د بهرنیو چارو وزارت په یوه بیان کې وویل: "یو ځل بیا، د RSF ملیشه خپله جنایي او ترهګریزه ماهیت څرګندوي، چې د خپل سیمه‌ییز ملاتړ کوونکي په استازیتوب د سودان خلکو او د هغوی د ملي دولت پر وړاندې نیابتي جګړه کوي."

په بیان کې زیاته شوې: "دا وروستۍ ترهګریزه پېښه، چې د انسانیت وجدان یې ولړزاوه، د یکشنبې په ورځ په اومدرمان کې ۳۱ ملکي وګړي په سړه سینه اعدام شول."

د یکشنبې په ورځ، د سودان د ډاکټرانو شبکې راپور ورکړ چې د RSF ځواکونو په اومدرمان کې د السالها په سیمه کې ۳۱ کسان، چې ماشومان هم په کې شامل وو، وژلي دي. فعالانو په ټولنیزو رسنیو کې داسې ویډیوګانې شریکې کړې چې په کې د RSF یونیفورم لرونکي کسان د خلکو پر یوې ډلې ډزې کوي.

خو RSF د یکشنبې په ورځ په یوه بیان کې د دې پېښې مسؤلیت رد کړ، او ادعا یې وکړه چې په ویډیوګانو کې ښودل شوي وسله‌وال کسان د دوی له لیکو سره تړاو نه لري. د څو اونیو راهیسې، د اومدرمان په بېلابېلو برخو کې د سوداني پوځ او د RSF وسله‌والو ترمنځ نښتې روانې دي، ځکه چې دا ډله په خرطوم ایالت کې د خپلو وروستیو مرکزونو دفاع کوي.

د پوځ په یوه بیان کې ویل شوي دي، په جلا توګه، د شمالي دارفور ایالت په مرکز الفاشر ښار کې د پوځ او RSF ترمنځ خونړۍ نښتې شوې دي. په همدې حال کې، د الفاشر د مقاومت همغږۍ کمیټې، چې یوه ولسي ډله ده، وویل چې "نن په ټول ښار کې د درنو او سپکو وسلو په ګډون سختې او دوامداره جګړې روانې دي."

په یوه بیان کې، کمیټې وویل چې څو خیریه پخلنځي او د خوراکي توکو مرکزونه د حالاتو تر آرامېدو پورې خپل فعالیتونه په موقت ډول ځنډولي دي، "د ښار د اوسني سخت وضعیت له امله." دوی زیاته کړه: "د قصدي او سختې بمبارۍ له زیاتېدو سره، د ګرمې ډوډۍ چمتو کول د پخلی کوونکو او رضاکارانو لپاره د ژوند ګواښونکي خطر په توګه بدل شوي دي."

دغه خیریه پخلنځي په الفاشر کې لسګونو زرو اوسېدونکو او داخلي بې‌ځایه شویو کسانو ته ګرمې ډوډۍ برابروي، چې ډېری یې د RSF له لوري د یو کلن محاصرې لاندې سختې ستونزې ګالي.

له ۲۰۲۳ کال د اپرېل له ۱۵مې راهیسې، RSF  د هېواد د کنټرول لپاره د سوداني ځواکونو پر وړاندې جګړه کوي، چې په پایله کې یې زرګونه کسان وژل شوي او نړۍ کې یو له بدترینو بشري بحرانونه رامنځته شوی دی. د ملګرو ملتونو او ځايي چارواکو په وینا، تر اوسه له ۲۰ زرو زیات کسان وژل شوي او ۱۵ میلیونه نور بې‌ځایه شوي دي. په هر حال، د امریکا د څېړونکو د څېړنو له مخې، د مړو شمېر شاوخوا ۱۳۰ زره اټکل شوی دی.