تهران د خپل ستر مذهبي مشر د غچ اخیستو ژمنه وکړه او ۴۰ ورځې عمومي ماتم یې اعلان کړ.
د ایران دولتي رسنیو خبر ورکړی چې د دغه هېواد ستر مذهبي مشر، ایت الله علي خامنهیي د اسرائیل او امریکا په بریدونو کې وژل شوی دی؛ دې پېښې د سپاه پاسداران له لوري د غچ اخیستو غوښتنې راپارولي دي.
دولتي ټلویزیون د یکشنبې په ورځ د ۸۶ کلن مذهبي مشر له مړینې وروسته، چې له ۱۹۸۹ کال راهیسې په واک کې و، ۴۰ ورځې ماتم او اووه ورځې عمومي رخصتي اعلان کړه. یوه ویاند وویل: "د ستر مشر په شهادت سره به د هغه لاره او ماموریت نه ورک کېږي او نه به هېرېږي، بلکې په ډېر قوت او جذبې سره به دوام ومومي."
په ورته وخت کې، د ایران سپاه پاسداران انقلاب ځواکونو ژمنه وکړه چې د خامنهیي "قاتلانو" ته به سزا ورکړي. سپاه په خپله اعلامیه کې وویل: "د امت د امام د قاتلانو لپاره د سختې، پرېکنده او پښېمانه کوونکې سزا په موخه به د ایران د ملت د غچ لاس هغوی پرېنږدي."
ایراني رسنیو راپور ورکړی چې په دغو بریدونو کې د ستر مشر لور، زوم او لمسۍ هم وژل شوي دي. فارس خبري اژانس او نورو رسنیو وویل: "د ستر مشر له کورنۍ سره له اړیکې وروسته، متاسفانه د انقلاب د مشر د لور، زوم او لمسۍ د شهادت خبر تایید شو."
د ټرمپ او نتنیاهو څرګندونې
تر دې وړاندې د شنبې په ورځ، د امریکا ولسمشر ډونالډ ټرمپ او د اسرائیل لومړي وزیر بنیامین نتنیاهو ادعا کړې وه چې خامنهیي "مړ" دی. ټرمپ وویل: "دا نه یوازې د ایران د خلکو لپاره، بلکې د هغو امریکایانو او نورو هېوادونو د خلکو لپاره هم انصاف دی چې د خامنهیي او د هغه د خونړي ټولي لخوا وژل شوي یا ټپیان شوي دي." نتنیاهو هم په یوه ویډیويي پیغام کې وویل: "نن سهار مو په یوه ځواکمن او ناڅاپي برید کې د ظالم خامنهیي مرکز له منځه یووړ."
د برید جزیات
د امریکایي سرچینو په وینا، اسرائیل او امریکا دا برید داسې تنظیم کړی و چې له خپلو لوړپوړو سلاکارانو سره د خامنهیي د ناستې له وخت سره سمون ولري. ادعا کېږي چې په دې برید کې د علي شمخاني او محمد پاکپور په څېر لوړپوړي جنرالان هم وژل شوي دي.
راپورونه وايي چې استخباراتو د شنبې په سهار د خامنهیي د ناستې ځای په نښه کړ او برید یې مخکې له مخکې ترسره کړ ترڅو هغه د تېښتې فرصت پیدا نه کړي. د سپوږمکۍ (سټلایټ) انځورونه تاییدوي چې په تهران کې د خامنهیي د امنیتي تدابیرو لاندې مرکز په بشپړه توګه ویجاړ شوی دی.
