د سوریې پوځ په حلب کې د پخواني بعث رژیم سره د تړاو په تور اته کسان نیولي دي
پوځ وايي، شکمنو کسانو هڅه کوله چې د PKK/YPG ترهګرو تر کنټرول لاندې سیمو ته ننوځي
د سوریې پوځ د یکشنبې په ورځ اعلان وکړ چې اته کسان یې د پخواني بعث رژیم سره تړاو درلودونکي نیولي دي ځکه چې دوی هڅه کوله د PKK/YPG ترهګرې ډلې تر کنټرول لاندې سیمو ته ننوځي، چې په سوریه کې د SDF په نوم فعالیت کوي.
د سوریې د دفاع وزارت د رسنیو او مخابراتو ریاست د یوې اعلامیې له مخې چې د دولتي خبري اژانس سانا لخوا خپره شوې، دا کسان د حلب ولایت په دیر حفیر کې د عملیاتو په جریان کې نیول شوي دي.
تېره میاشت هم د سوریې پوځ په لاذقیه او طرطوس کې ورته عملیات ترسره کړي وو، وروسته له هغه چې له پخواني رژیم سره تړلو وسله والو ډلو پر ملکي وګړو او امنیتي ځواکونو بریدونه کړي وو.
نوموړي اژانس زیاته کړه، پوځ ویلي چې د دوی ماموریت «د امنیت ساتل او د کورنیو امنیتي ځواکونو سره په همغږۍ د ثبات بېرته راوستل» دي.
د ۲۰۲۴ کال په دسمبر کې د بشار الاسد د رژیم له نسکورېدو وروسته، د سوریې نوې ادارې په ټول هېواد کې د شرایطو د ښه کېدو په موخه اقتصادي او سیاسي اصلاحات پیل کړي دي.
اسد، چې نږدې ۲۵ کاله د سوریې مشر پاتې شوی و، د خپلې واکمنۍ له نسکورېدو وروسته روسیې ته وتښتېد، چې له دې سره د بعث ګوند هغه رژیم پای ته ورسېد چې له ۱۹۶۳ کال راهیسې پر واک کې و.
د ۲۰۲۵ کال په جنورۍ کې د ولسمشر احمد الشرع په مشرۍ یوه نوې انتقالي اداره جوړه شوه.
