تهران وایي په دغه وړاندیز کې په ټولو جبهو کې د جګړې پایته رسول، د بندیزونو لیرې کول او د ایران له شاوخوا څخه د امریکايي ځواکونو وتل شامل دي.

ایران د سه شنبې په ورځ د هغه وروستي وړاندیز جزییات څرګند کړل چې متحده ایالاتو ته یې د هغې جګړې د پای ته رسولو لپاره سپارلی چې واشنګټن او اسرائیل د فبرورۍ په میاشت کې د تهران په وړاندې پیل کړې وه.

دا جزییات د ایران د بهرنیو ځاروو وزارت مرستیال کاظم غریب آبادي د پارلمان د ملي امنیت او بهرني سیاست کمیټې له غړو سره په کتنه کې بیان کړل. هغه د ایران او امریکا ترمنځ د ډیپلوماسۍ د وروستیو پرمختګونو په اړه یو جامع راپور وړاندې کړ.

د ایران د رسمي خبري اژانس  په حواله، غریب آبادي وویل چې د تهران په وړاندیز کې "د یورانیمو د بډاینې او د سوله ییزو اټومي فعالیتونو پر حق" ټینګار شوی دی.

په دغه وړاندیز کې همدارنګه د لبنان په ګډون په ټولو جبهو کې د شخړو پای، د امریکا د سمندري کلابندۍ  ختمول، د ایران د شتمنیو ازادول او د بیارغونې د هڅو د ملاتړ لپاره د وروستۍ جګړې له امله د اوښتو زیانونو د تاوان ورکول شامل دي.

هغه وویل چې په وړاندیز کې د ټولو یو اړخیزو بندیزونو او د ملګرو ملتونو د امنیت شورا د پرېکړه لیکونو لیرې کول، او د اسلامي جمهوریت له شاوخوا سیمو څخه د امریکايي ځواکونو وتل هم غوښتل شوي دي.
د مۍ په ۱۰مه، ایران د پاکستان له لارې د جګړې د پای ته رسولو په اړه د امریکا وړاندیز ته ځواب ورکړ، خو ولسمشر ډونالډ ټرمپ د ایران وړاندیز "په بشپړ ډول د نه منلو وړ" وباله. ایراني رسنیو د دوشنبې په ورځ وویل چې ایران د پاکستاني منځګړو له لارې د امریکا لوري ته یو تعدیل شوی ۱۴ ماده‌یز وړاندیز سپارلی دی.

د شنبې په ورځ، ټرمپ یو ځل بیا د پوځي کړکېچ د زیاتوالي ګواښ وکړ او په خپله 'ټروټ سوشل' (Truth Social) پاڼه یې د جنګي کښتیو یو انځور خپور کړ چې ورسره دا جمله لیکل شوې وه: "دا له طوفان مخکې آرامي وه."

د دوشنبې په ماښام، ټرمپ اعلان وکړ چې ده د سعودي عربستان، قطر او متحده عربي اماراتو په غوښتنه د سه شنبې په ورځ پر ایران پلان شوی برید وځنډاوه. هغه زیاته کړه چې د دفاع وزارت ته یې لارښوونه کړې ترڅو په هغه صورت کې چې یوې د منلو وړ هوکړې ته ونه رسیږي، "په یوه دقیقه کې د ایران په وړاندې د بشپړ او پراخ برید لپاره چمتو واوسي."

د پاکستان په منځګړیتوب د خبرو اترو له ځنډېدو وروسته، متحده ایالاتو د اپریل له ۱۳مې راهیسې د هرمز تنګي په اوږدو کې د ایران پر بندرونو سمندري کلابندي لګولې ده. ایران د دې په ځواب کې تنګی وتاړه. دا په داسې حال کې ده چې د اپریل له ۸مې راهیسې د شته نازک اوربند د ماتېدو وېره شتون لري که چېرې د جګړې د پای ته رسولو لپاره کومه هوکړه ونه شي.