پاکستاني ځواکونو په بلوچستان کې همغږي بریدونه په شا تمبولي او ۱۳۳ ترهګر یې وژلي
یو لوړپوړی امنیتي چارواکی وايي، ترهګرو د بلوچستان ایالت په ۱۲ بېلابېلو ځایونو کې بریدونه کړي دي.

یو پاکستاني امنیتي چارواکي د شنبې په ورځ ناوخته وویل، وروسته له هغه چې پاکستاني امنیتي ځواکونو د سوېل لوېدیځ بلوچستان ایالت کې لوی "همغږي" بریدونه په شا وتمبول، په نښتو کې لږ تر لږه ۱۵ سرتېري، ۱۸ ملکي وګړي او ۱۳۳ ترهګر وژل شوي دي.

یوه لوړپوړي امنیتي چارواکي د نوم نه ښودلو په شرط، ځکه رسنیو سره د خبرو اجازه یې نه درلوده، وویل، ترهګرو د ایالتي مرکز کوټې په ګډون د ایالت په ۱۲ بېلابېلو ځایونو کې همغږي بریدونه کړي دي.

دغه چارواکي وویل: "وسله‌والو د کوټې، نوشکي، دالبندین، پسني او ګوادر په ګډون د امنیتي ځواکونو د تاسیساتو په شمول ګڼ ځایونه په نښه کړل."

هغه زیاته کړه چې د پاکستان وسله‌والو ځواکونو، فرنټیر کور او بلوچستان پولیسو چټک اقدام وکړ ترڅو هغه څه شنډ کړي چې ده د ترهګرو "ناوړه پلانونه" وبلل.

د بیان له مخې، د شنبې د ورځې په عملیاتو کې د دریو ځانمرګو بریدګرو په ګډون ۹۲ وسله‌وال ووژل شول، په داسې حال کې چې ۴۱ نور د جمعې په ورځ په ټول ایالت کې په جلا امنیتي اقداماتو کې ووژل شول، چې په تېرو ۴۸ ساعتونو کې یې ټوله شمېره ۱۳۳ ته ورسېده.

د پوځ په بیان کې راغلي: "استخباراتي راپورونو په ډاګه تایید کړې چې دا بریدونه د هغو ترهګرو مشرانو له خوا تنظیم شوي او لارښوونه یې شوې چې له پاکستانه بهر فعالیت کوي، او د پېښې په اوږدو کې یې له ترهګرو سره مستقیمه اړیکه درلوده."

د نښتو پر مهال ۱۵ امنیتي پرسونل هم وژل شوي او ګڼ نور ټپیان دي.

پوځ په دې اړه سمدستي کومه اعلامیه نه ده خپره کړې.

د جمعې په ورځ، پوځ ویلي وو چې د بلوچستان په هرنائي او پنجګور ولسوالیو کې په دوو جلا امنیتي عملیاتو کې لږ تر لږه ۴۱ ترهګر وژل شوي دي.

پاکستان په وروستیو کلونو کې، په ځانګړې توګه په لوېدیځو او سوېل لوېدیځو سیمو کې د تاوتریخوالي له نوې څپې سره مخ دی.

ترکیې په نښتو کې د وژل شویو پاکستاني سرتېرو له امله خواخوږي څرګنده کړې ده.

د تورکیې د بهرنیو چارو وزارت د ترکیې پر ټولنیزې رسنۍ NSosyal په یوه خپره شوې لیکلې اعلامیه کې ویلي، چې په بلوچستان کې شوي بریدونه غندي.

وزارت د پاکستان خلکو ته خپله خواخوږي وړاندې کړې او وژل شویو پاکستاني سرتېرو ته یې د مغفرت دعا کړې ده.

دې وزارت د ترهګرۍ پر وړاندې مبارزه کې له پاکستان سره د ترکیې پر پیوستون هم یو ځل بیا ټینګار وکړ.