د دغه هېواد د ملکي هوايي چلند ادارې اعلان کړی چې د سعودي عربستان په پلازمېنه ریاض کې د ملک خالد پر نړیوال هوايي ډګر په شوي برید کې ۱ تن ژوند له لاسه ورکړی او ۱۱ نور ټپیان شوي دي.
د ملکي هوايي چلند عمومي ادارې د یکشنبې په ورځ ناوخته په یوه بیان کې تایید کړه چې وژل شوی کس پاکستانی تبعه دی او ټپیان د درملنې لپاره روغتون ته لېږدول شوي دي.
دغې ادارې (ویلي چې برید مالي زیانونه هم اړولي او د زیانونو د ارزونې چارې روانې دي.
په یمن کې د سعودي په مشرۍ ایتلاف اعلان کړی و چې د یکشنبې په ماسپښین یو نامعلوم توکی د هوايي ډګر پر څلورم (4) ترمینل لګېدلی او د اورلګېدنې لامل شوی دی.
یاد برید پر همدې هوايي ډګر له یوه بل برید څخه یوه ورځ وروسته رامنځته شوی چې په ترڅ کې یې ۱۲ کسان وژل شوي او تر ۳۰۰ ډېر ټپیان شوي وو.
د سعودي پر هوايي چلند او نفتو پر تاسیساتو بریدونه
د سعودي په مشرۍ ایتلاف د دغه برید پړه پر حوثي ملیشو واچوله او دغه پېښه یې د نړیوالو بشردوستانه قوانینو سرغړونه وبلله، او زیاته یې کړه چې دوی به ورته سخت ځواب ورکړي.
سعودي عربستان تر دې وړاندې اعلان کړی و چې په ختیځ ښار دمام کې د ملک فهد په نړیوال هوايي ډګر هم برید شوی، دا په داسې حال کې ده چې یمني حوثي ملیشو ادعا کړې وه چې په سعودي عربستان کې یې پر دوو هوايي ډګرونو او د تېلو پر سترو تاسیساتو بریدونه کړي دي.
د سعودي د ملکي هوايي چلند عمومي ادارې خبر ورکړی چې له اړوندو چارواکو سره په همغږۍ کې په هوايي ډګر کې د زیانونو د ارزونې او امنیتي څېړنو چارې پر مخ وړي.
چارواکو د ځاني زیانونو یا د مالي زیان د کچې په اړه کره معلومات نه دي ورکړي.
د سعودي په مشرۍ ایتلاف د ایکس (X) ټولنیزې شبکې له لارې په یوه خپره کړې اعلامیه کې ویلي چې د دوی هوايي مدافع سیستم د سعودي عربستان په ختیځه سیمه کې یوه بې پیلوټه الوتکه (ډرون) نیولې او له منځه وړې ده.
