پداسې حال کې چې په ایران کې د اقتصادي بحران له امله مظاهرې او ناکراري دوام لري یو تن امنیتي سرتیری ووژل شو.

دولتي رسنۍ وایي، د ایران د بسیج ځواک یو ۲۱ کلن غړی د اقتصادي ستونزو له امله په راپورته شویو لاریونونو کې وژل شوی، په داسې حال کې چې په تهران کې مظاهرې کمې شوي خو نورو ولایتونو ته غځېدلي دي.

دولتي ټلویزیون د پنجشنبې په ورځ د یوه سیمه ییز چارواکي په حواله خبر ورکړ چې د ایران د امنیتي ځواکونو یو غړی د اسلامي جمهوریت د خراب اقتصاد له امله په راپورته شویو لاریونونو کې وژل شوی، چې له تېرې اونۍ راهیسې یې ټول هېواد نیولی دی.

دغه چینل د لرستان ولایت د مرستیال والي، سعید پورعلي له قوله ویلي: "د کوهدشت ښار د بسیج یو ۲۱ کلن غړی تېره شپه (چهارشنبه) د عامه نظم د دفاع پر مهال د بلواګرو له خوا ووژل شو."

په پلازمېنه تهران کې مظاهرې ورو شوي، خو نورو ولایتونو ته غځېدلي دي.

پورعلي وویل: "دا لاریونونه د اقتصادي فشارونو، انفلاسیون او د اسعارو د بدلونونو له امله دي او د معیشت د اندېښنو څرګندونه کوي." "د خلکو غږ باید په دقت او تدبیر سره واورېدل شي، خو خلک باید اجازه ورنکړي چې غوښتنې یې د ګټې لټوونکو کسانو له خوا منحرفې شي."

دا لاریونونه په ایران کې له ۲۰۲۲ کال راهیسې تر ټولو لوی دي، کله چې په پولیسو کې د ۲۲ کلنې مهسا امیني مړینې په ټول هېواد کې لاریونونه راوپارول. خو دا لاریونونه لا تر اوسه په ټول هېواد کې نه دي غځېدلي او د امیني د مړینې په څېر شدید نه دي، چې د چارواکو د خوښې خلاف د حجاب نه اغوستلو په تور نیول شوې وه.

د ایران حکومت د چهارشنبې ورځ د سړې هوا له امله په ډېرو برخو کې عمومي رخصتي اعلان کړې وه، چې ښایي موخه یې د اوږدې اونۍ په پای کې له پلازمېنې څخه د خلکو لرې کول وي. په ایران کې د اونۍ پای د پنجشنبې او جمعې ورځې دي، او شنبه هم د یوې مذهبي ورځې له امله عمومي رخصتي اعلان شوې ده.

په لاریونونو کې چې ریښه یې په اقتصادي مسایلو کې ده، لاریون کوونکو د حکومت پر ضد شعارونه هم ورکړي دي. د هېواد مشران لا هم د هغه ۱۲ ورځنۍ جګړې تر اغېز لاندې دي چې اسرائیلو د جون په میاشت کې د دغه هېواد پر ضد پیل کړې وه. امریکا هم د جګړې پر مهال د ایران اټومي تاسیسات بمبار کړي وو.