د امریکا سترې محکمې دریم هیواد ته د کډوالو د ډیپورت په اړه د ټرمپ پلان قبول کړ.
د امریکا سترې محکمې د ټرمپ ادارې ته اجازه ورکړې چې مهاجرین په چټکۍ سره دریمو هېوادونو ته وشړي، حتی که هغه هېوادونه د مهاجرینو اصلي هېوادونه هم نه وي.
دغه پرېکړه، چې پرته له بشپړ وضاحت څخه خپره شوې، د یوې ټیټې محکمې هغه امر لغوه کوي چې د دې ډول شړنو مخه یې نیولې وه.
د محکمې محافظه کار اکثریت د خپلې پرېکړې په اړه وضاحت ورنه کړ، کوم چې په بیړنیو قضیو کې معمول دی. په همدې حال کې، درې لیبرال قاضیانو مخالفت وکړ او خبرداری یې ورکړ چې دا پرېکړه د خلکو ژوند له خطر سره مخ کولی شي.
دغه قضیه د مې میاشتې یوې پېښې سره تړاو لري، کله چې د امریکا چارواکو اته بهرني اتباع، چې د میانمار، ویتنام او کیوبا وګړي وو، د سویلي سوډان پر لور په الوتکه کې ولېږدول، سره له دې چې د محکمې یو امر موجود و چې هغوی ته د شړلو پر وړاندې د اعتراض حق ورکوي.
د امریکا د ولسوالۍ قاضي، براین ای مورفي، پرېکړه کړې وه چې د افرادو شړل بل هېواد ته پرته له قانوني ارزونې څخه د امریکا د نړیوالو ضد شکنجې قوانینو د مکلفیتونو سرغړونه کېدای شي.
د مورفي د امر په ځواب کې، الوتکه د جیبوتي په یوه امریکایي سمندري هډه کې ودرول شوه، چیرې چې مهاجرین په موقتي ځایونو کې ساتل شوي وو.
د سترې محکمې پرېکړه د مورفي د پراخې اندېښنې مخه نه نیسي چې مهاجرینو ته باید د دې فرصت ورکړل شي چې د دریم هېواد ته د شړلو پر وړاندې خپل دلیلونه وړاندې کړي. خو دا پرېکړه حکومت ته اجازه ورکوي چې د قانوني پروسو تر بشپړېدو پورې دغه ډول شړنې بیا پیل کړي.
د بله پلوه د امریکا یو تن قاضي سونیا سوټومایور خبرداری ورکړ چې دا پرېکړه "زرګونه کسان د شکنجې یا مرګ له خطر سره مخ کولی شي."
هغې لیکلي: "حکومت په څرګنده توګه په خپلو کړنو کې ښودلې چې ځان د قانون تابع نه ګڼي او هر څوک هر ځای ته پرته له خبرتیا یا د اورېدنې فرصت څخه شړي."
د ټرمپ ادارې له ځینو هېوادونو سره، لکه پاناما او کوسټاریکا، تړونونه کړي چې هغه کسان ومني چې د هغوی اصلي هېوادونه یې نه مني.
په یوه جلا قضیه کې، سترې محکمې مخکې له دې چې ټیټې محکمې پرېکړه وکړي چې مهاجرینو ته د قانوني اعتراض لپاره څومره وخت ورکول شي، د السلوادور ته د شړنو مخه نیولې وه.
قاضي مورفي، چې د بایډن لخوا ټاکل شوی، مخکې په یوه بله مشهوره قضیه کې مداخله کړې وه، چیرې چې یې د ګواتیمالا یو سړی بېرته امریکا ته راوستلو امر کړی و، هغه سړی چې په مکسیکو کې د شړلو وروسته د ناوړه چلند سره مخ شوی و.
دغه سړی، چې په محکمه کې یې نوم د O.C.G. په توګه یاد شوی، باور کیږي چې د ټرمپ د نوي مهاجرت سیاستونو لاندې لومړنی مهاجر و چې د شړلو وروسته بېرته د امریکا په ولکه کې راوستل شو.
