پنټاګون وايي، تمه کېږي چې د امریکايي ځواکونو د وتلو بهیر په راتلونکو شپږو تر دولسو میاشتو کې بشپړ شي.

پنټاګون وویل، د امریکا د دفاع وزیر پیټ هیګسیت امر کړی چې په راتلونکي کال کې له جرمني څخه شاوخوا ۵۰۰۰ سرتېري وایستل شي.

د جمعې ورځې دا اعلان وروسته له هغې وشو چې د امریکا ولسمشر ډونالډ ټرمپ د دې اونۍ په پیل کې وویل، چې د ایران پر وړاندې د امریکا او اسرائیلو د جګړې پر سر د جرمني له لومړي وزیر فریډریک مرز سره د شخړې له امله به له دغه ناټو متحد هېواد څخه سرتېري وباسي.

د پنټاګون ویاند شان پارنیل په یوه بیان کې وویل: "موږ تمه لرو چې د وتلو بهیر په راتلونکو شپږو تر دولسو میاشتو کې بشپړ شي."

پارنیل زیاته کړه: "دا پرېکړه په اروپا کې د وزارت د ځواکونو د وضعیت له بشپړې ارزونې وروسته شوې او د جګړې د ډګر د اړتیاوو او پر ځمکه د شته شرایطو په پام کې نیولو سره شوې ده."

ټرمپ د سه‌شنبې په ورځ وویل چې مرز "فکر کوي دا سمه ده چې ایران اټومي وسله ولري. هغه نه پوهېږي چې څه وايي!"

د چهارشنبې په ورځ، ټرمپ وویل چې واشنګټن په جرمني کې د امریکايي ځواکونو د "احتمالي کمښت مطالعه او بیاکتنه کوي" او دا چې هغه به "په لنډ وخت کې" پرېکړه وکړي.

د پنجشنبې په ورځ، ټرمپ په بیضوي دفتر کې خبریالانو ته وویل چې ممکن د جګړې پر مهال د ملاتړ د نشتوالي له امله له ایټالیا او اسپانیا څخه هم امریکايي سرتېري وباسي: "ایټالیا له موږ سره هیڅ مرسته نه ده کړې او اسپانیا وحشتناکه وه، بالکل وحشتناکه."

ټرمپ وویل: "هو، شاید، زه به شاید دا کار وکړم. ولې یې ونه کړم؟"

د ۲۰۲۵ کال د ډسمبر تر ۳۱مې پورې، په ایټالیا کې ۱۲،۶۶۲، په اسپانیا کې ۳،۸۱۴ او په جرمني کې ۳۶،۴۳۶ فعال امریکايي سرتېري مېشت وو.

د جرمني د بهرنیو چارو وزیر یوهان وادپول د پنجشنبې په ورځ مراکش ته د سفر پر مهال، وویل چې جرمني د امریکايي ځواکونو کمښت ته "چمتو" دی او "د ناټو په ټولو ارګانونو کې له نږدې او د باور په فضا کې پرې بحث کوي."

په داسې حال کې چې وادپول په جرمني کې د لږ شمېر امریکايي سرتېرو د شتون په اړه ځان "ارام" وښود، خو ویې ویل چې په جرمني کې د امریکا لویې اډې "هیڅ د بحث وړ نه دي."

هغه د بېلګې په توګه وویل چې د رامشټاین هوايي اډه "د متحده ایالاتو او زموږ دواړو لپاره یو نه بدلېدونکی رول لري."

اروپايي ټولنې د پنجشنبې په ورځ وویل چې په اروپا کې د امریکايي ځواکونو ځای پر ځای کول د واشنګټن په ګټه دي، او دا چې متحده ایالات "د اروپا د امنیت او دفاع په برخه کې یو حیاتي ملګری دی."