د وزارت په وینا، په شړل شویو کسانو کې هغه نارینه شامل دي چې د جنسي تېري، وهلو ټکولو او د مخدره توکو د قاچاق په جرمونو محکوم شوي وو.
په اعلامیه کې ویل شوي چې د لایپزیګ له هوايي ډګر څخه دا الوتنه د درېیمګړي هېواد له منځګړیتوب پرته، د یوې مستقیمې هوکړې پر بنسټ لومړنۍ الوتنه وه چې ترسره شوه. د وزارت چارواکو یادونه وکړه چې پخوا به دا ډول الوتنې د قطر په منځګړیتوب کېدې، خو دا ځل د مستقیمو اړیکو په پایله کې دا اقدام شوی دی.
د جرمني د کورنیو چارو وزیر، الکساندر ډوبرینډټ په دې اړه وویل:
"دا هوکړه افغانستان ته د مستقیمو او دایمي شړلو لپاره یوه باوري اډانه رامنځته کوي. د مجرمینو شړل د کډوالۍ په پالیسۍ کې د کنټرول او روښانه دریځ یو بنسټیز جز دی. زموږ د ټولنې په ګټه ده چې مجرمین زموږ له هېواده ووځي، له همدې امله موږ په پرېکنده ډول عمل کوو او دا لړۍ ګام په ګام پراخوو."
