روسیه له اوکراین سره د استانبول خبرو بیا پیلولو ته چمتو ده ، دا خبره د روسیې استازي وکړه.

په تورکیه کې د روسیې شارژدافیر وايي، اوکراین تر اوسه د سولې پخوانیو نوښتونو ته ځواب نه دی ویلی.

په تورکیه کې د روسیې شارژدافیر، الیکسي ایوانوف، د چهارشنبې په ورځ وویل چې روسیه په استانبول کې له اوکراین سره د خبرو بیا پیلولو ته چمتو ده، خو کییف تر اوسه پخوانیو وړاندیزونو ته ځواب نه دی ویلی.

ایوانوف د روسیې دولتي خبري اژانس TASS ته وویل: "روسیې لوري په پرله پسې توګه ټینګار کړی چې موږ له اوکراین سره مستقیمو خبرو ته چمتو یو. زموږ ترکي ملګرو هم په دوامداره توګه ټینګار کړی چې د استانبول پلیټ فارم موږ ته شتون لري — دا دروازې خلاصې پاتې دي."

هغه وویل، روسیې پخوا څو نوښتونه وړاندې کړي وو، په شمول د دریو آنلاین کاري ډلو د جوړولو وړاندیز، خو "له بده مرغه، موږ تر اوسه د اوکراین له لوري مثبت ځواب نه دی ترلاسه کړی."

ایوانوف زیاته کړه چې مسکو خبرو اترو ته خلاص دی "که کییف سیاسي اراده وښيي."

په ورته وخت کې، د اوکراین د ملي امنیت او دفاع شورا منشي، رستم عمروف، چې له روسیې سره د مستقیمو خبرو لپاره د کییف د پلاوي مشري کوي، د سې شنبې په ورځ استانبول ته ورسېد.

هغه په ټیلیګرام کې وویل چې د سفر موخه یې د جنګي بندیانو د تبادلې بیا پیل دی. هغه وویل: "په دې ورځو کې به زه په ترکیه او منځني ختیځ کې کار وکړم ترڅو د تبادلې بهیر خلاص کړم. یوه هوکړه شوې وه، او موږ باید هغه پلې کړو."

روسیې او اوکراین سږکال په استانبول کې د سولې د نویو خبرو درې پړاوونه ترسره کړل، چې د بندیانو او ملکي وګړو پر تبادلې یې هوکړه وکړه. دوی د خپلو اړوندو ماموریتونو په اړه یادداشتونه هم شریک کړل چې د ۲۰۲۲ کال په فبرورۍ کې د پیل شوې جګړې د پای ته رسولو په اړه وو.

مسکو د سیاسي، پوځي او بشري مسلو د حل لپاره د دریو آنلاین کاري ډلو د جوړولو وړاندیز کړی و، خو داسې ښکاري چې له هغه وخت راهیسې پرمختګ په ټپه درېدلی دی.

د تورکیې ترڅنګ، متحده عربي اماراتو، او تر یوې اندازې سعودي عربستان او قطر هم د روسیې او اوکراین ترمنځ د بشردوستانه تبادلو په منځګړیتوب کې رول لوبولی دی.