په امریکا کې یو تن په اسرائیل کې د امریکا په سفارت د برید کولو د هڅې په تور ونیول شو

د امريکا د فدرالي تحقيقاتو ادارې (FBI) يو دوه ګوني امريکايي-الماني تابعيت لرونکی کس په جان ايف کينيډي هوايي ډګر کې د اسرائيل په تل ابيب کې د امريکا د سفارت ودانۍ  ته  د اور اچولو هڅې په تور نيولی دی. دا خبره د امریکا د عدليې وزارت کړې ده.

جوزف نوماير، چې ۲۸ کلن دی، د يکشنبې په ورځ د اور اچووونکو يا چاودېدونکو موادو په کارولو سره په تل ابیب کې د امریکا سفارت ودانۍ د ويجاړولو هڅې په تور تورن شوی دی.

د FBI ځانګړو اجنټانو نوماير هغه مهال ونيولو کله چې دی د اسرائيلي چارواکو له خوا امريکا ته ډیپورت  شوی و او نيويارک ته ورسېد.

نوماير د نيويارک په ختيځې ولسوالۍ کې د امريکا د قاضي پيګي کو په وړاندې خپله لومړنۍ محاکمه وکړه، چېرته چې پرېکړه وشوه چې دی به تر بند لاندې پاتې کېږي.

نوماير چې د اپرېل په مياشت کې اسرائيل ته رسېدلی و او د مې په ۱۹مه يې په تل ابيب کې د امریکا سفارت ته نږدې د درېو جوړو شويو اور اچونکو وسايلو (چې عموماً د مولوتوف کوکتيل په نوم پېژندل کېږي) سره يو کڅوړه انتقالوله نیول شوی وو.

ګواښونکي پيغامونه

د نوماير د ټولنيزو رسنيو پوسټونو کې داسې ګواښونکي پيغامونه موندل شوي چې پکې ويل شوي: "راسره يوځای شئ چې په تل ابيب کې د امریکا سفارت وسوځوم." همدارنګه، ځينې نور پوسټونه د امريکا د ولسمشر ډونالډ ټرمپ يي په مرګ ګواښلی وو.

د امريکا لوی څارنوال پامېلا بانډي وويل: "وزارت به داسې تاوتريخوالی ونه زغمي او دغه تورن کس ته به د قانون تر ټولو سختې سزا ته ورسوي."

د FBI مشر کاش پټېل دغه کړنه "کرکجن او تاوتريخجن چلند" وباله.

د امریکا د عدلیې وزارت ویلي دي که چېرې نوماير مجرم وپېژندل شي، کېدای شي نو مایر  د پنځو څخه تر شلو کلونو پورې د بند سزا او تر ۲۵۰,۰۰۰ ډالرو پورې  نقدي جريمه  شي.

د نوماير د هڅې دوه ورځې وروسته، يو کس په واشنګټن کې د يهودي موزيم مخې ته د اسرائيلي سفارت دوه کارکوونکي په ډزو ووژل.