بروکسل هڅه کوي چې د مسکو په وړاندې تازه اقداماتو ته لاره هواره کړي، خو بوداپست غوښتنه کوي چې تر هغې دې د روسیې پر وړاندې د بندیزونو ویټو نه لیرې کېږي، ترڅو چې د اوکراین له لارې د تېلو زیانمنه شوې لاره بېرته نه وي رغول شوې.
د اروپايي ټولنې د بهرني سیاست مشرې ویلي چې پر روسیې د نویو بندیزونو په اړه د یوې هوکړې تمه نه لري، ځکه هنګري ژمنه کړې چې تر هغه به د دې کار مخه نیسي ترڅو چې اوکراین د تېلو یوه مهمه نللیکه بېرته نه وي خلاصه کړې. دغه ۲۷ هېوادیزه ټولنه په دې لټه کې ده چې پر اوکراین د روسیې د برید د څلورمې کلیزې په مناسبت پر مسکو نوي اقتصادي بندیزونه ولګوي.
کایا کالاس، د اروپايي ټولنې د بهرنیو چارو لوړپوړې استازې، د دوشنبې په ورځ د اروپايي ټولنې د بهرنیو چارو د وزیرانو په غونډه کې وویل: "زه فکر نه کوم چې نن به په دې اړه کوم پرمختګ وشي، مګر موږ به خامخا خپله هڅه وکړو."
د هنګري لومړي وزیر، ویکتور اوربان، د یکشنبې په ورځ وویل چې بوداپست به تر هغې بندیزونه ویټو کړي ترڅو چې د "درژبا" (Druzhba) نللیکه بېرته نه وي پرانیستل شوې. د هنګري د بهرنیو چارو وزیر پیټر سیارتو هم په بروکسل کې خبریالانو ته وویل: "تر څو چې دا کار نه وي شوی، د هنګري په دریځ کې به هیڅ بدلون رانشي."
اوکراین وايي چې د درژبا نللیکه، چې د دغه هېواد له خاورې سلواکیا او هنګري ته د روسیې تېل لېږدوي، د جنوري په ۲۷مه د روسیې په بریدونو کې زیانمنه شوې ده.
د آلمان د بهرنیو چارو وزیر، یوهان وادیپول، د هنګري پر دریځ حیرانتیا وښوده، خو هیله یې څرګنده کړه چې په پای کې به یوې بریا ته ورسېږي. بلخوا، د استونیا او پولنډ د بهرنیو چارو وزیرانو د هنګري دا کار "ټکان ورکوونکی" بللی او ویلي یې دي چې د نللیکې د بندېدو مسؤلیت د روسیې پر غاړه دی، نه د اوکراین.
پر بندیزونو سربېره، بوداپست د اوکراین لپاره د اروپايي ټولنې د ۹۰ میلیارده یورو پور په مخ کې هم خنډونه جوړ کړي دي، چې کییف ورته د خپل وضعیت د ساتلو لپاره سخته اړتیا لري. هنګري د جګړې په تېرو څلورو کلونو کې په وار وار د اوکراین په اړه د اروپايي ټولنې د اقداماتو مخه نیولې ده. اوربان دا سخت دریځ په داسې حال کې غوره کړی چې هغه په راتلونکي اپریل کې د ټاکنو له امله د خپل سیاسي بقا لپاره مبارزه کوي.
اروپايي ټولنې تر دې دمه د اوکراین د جګړې له امله پر مسکو ۱۹ پړاوونه بندیزونه لګولي دي. په نوي وړاندیز کې د روسیې د خامو تېلو د لېږدولو پر خدماتو بندیز هم شامل دی ترڅو د مسکو عواید نور هم کم شي.
