ایران وايي چې له امریکا سره مذاکرات کوي، خو پر "دښمن باور نه لري"؛ قالیباف خبرداری ورکوي چې واشنګټن ممکن "هر وخت" جګړه سخته کړي.
د ایران د پارلمان رئیس محمد باقر قالیباف ویلي چې تهران له امریکا سره خبرو اترو ته دوام ورکوي، خو د تاوتریخوالي د بیا پیلېدو د وېرې له امله د "لازمو اقداماتو" لپاره هم پوره چمتو دی.

د ایران د "مهر" خبري اژانس د راپور له مخې، قالیباف په خپلو تلویزیوني څرګندونو کې وویل: "موږ پر دښمن باور نه لرو. هغه (دښمن) ممکن هر وخت جګړې ته شدت ورکړي." نوموړي زیاته کړه: "موږ مذاکرات کوو، خو د اړینو اقداماتو لپاره هم چمتو یو."

هغه وویل چې ایران د تېر کال د جون میاشتې له ۱۲ ورځنۍ جګړې څخه درسونه اخیستي او د هرې راتلونکې مقابلې لپاره چمتووالی لري. قالیباف دا ادعا هم وکړه چې له امریکا او اسرایلو سره اوسنۍ شخړه د خبرو اترو په منځ کې د "امریکايي غولونې" له امله پیل شوې ده.

دا څرګندونې وروسته له هغه وشوې چې د امریکا مرکزي قوماندانۍ (سنتکام) تایید کړه چې سمندري ځواکونو یې په عمان خلیج کې یوه ایراني باروړونکې کښتۍ "درولې" او "له کاره غورځولې" ده. سنتکام پر 'ایکس' پاڼه ولیکل: "په عربي بحیره کې امریکايي ځواکونو د هغې ایراني کښتۍ پر وړاندې د سمندري بندیز هڅه وکړه چې غوښتل یې د ایران یو بندر ته لاړه شي."

د ایران د "خاتم الانبیاء" نظامي قرارګاه هم د امریکا لخوا پر دغې کښتۍ برید تایید کړی دی. تهران ژمنه کړې چې د دغه اقدام په غبرګون کې به، چې دوی یې "سمندري غلا" بولي، "ډېر ژر" غچ واخلي. یادې قرارګاه وویل: "متجاوزې امریکا د اوربند په نقض او سمندري غلا سره، د عمان خلیج په اوبو کې د ایران پر یوې سوداګریزې کښتۍ برید وکړ او د هغې د تګ راتګ (navigation) سیسټم یې له کاره وغورځاوه."

"د هرمز تنګی وړیا نه دی"
بلخوا، د ایران د ولسمشر لومړي مرستیال محمد رضا عارف خبرداری ورکړی چې که د ایران د تېلو پر صادراتو محدودیتونه وي، نو د هرمز تنګي امنیت نه شي تضمین کېدای. عارف پر 'ایکس' پاڼه ولیکل: "هیڅوک نه شي کولای د ایران د تېلو صادرات محدود کړي او بیا له موږ څخه د نورو لپاره د وړیا امنیت تمه ولري. د هرمز تنګي امنیت وړیا نه دی."

عارف زیاته کړه چې نړۍ اوس له دوو لارو څخه د یوې په مخ کې ده: "یا د ټولو لپاره د تېلو ازاد بازار، او یا د هر چا لپاره درانه لګښتونه." هغه وویل چې د تېلو د نړیوالو بیو ثبات د ایران او د هغې د متحدینو پر وړاندې د اقتصادي او نظامي فشارونو پر دایمي پای ته رسېدو پورې اړه لري.
د فبرورۍ پر ۲۸مه، امریکا او اسرائیلو پر ایران ګډ برید وکړ، چې ایران یې په ځواب کې پر اسرائیلو او په سیمه کې د امریکا پر تاسیساتو بریدونه وکړل. دا جګړه د اپریل له ۸مې راهیسې وروسته له هغه په ټپه ولاړه ده چې پاکستان د دوو اونیو لپاره د اوربند منځګړیتوب وکړ. د روانې میاشتې په پیل کې د امریکا او ایران ترمنځ په پاکستان کې د تلپاتې سولې لپاره خبرې وشوې او اوس په اسلام اباد کې د بل پړاو خبرو لپاره هڅې روانې دي.