د پاکستان په شمال لویدیځ کې د وسله والو په برید کې ۷ تنه ووژل شول
ګومان کیږي چې وسله والو د خیبر پښتونخوا په بنو ولسوالۍ کې د یوې سیمه ییزې "سولې ملیشې" پر دفتر برید کړی.
د پاکستان په شمال لویدیځ کې پولیسو د جمعې په ورځ وویل چې شکمنو وسله والو د یوې سیمه ییزې "سولې ملیشې" پر دفتر په وسله وال برید کې لږ تر لږه اوه کسان وژلي دي.
دا برید د پنجشنبې په شپه ناوخته د خیبر پښتونخوا ایالت په بنو ولسوالۍ کې شوی دی.
په دې برید کې دوه نور کسان هم ټپیان شوي دي.
د دې برید پړه تر اوسه کومې ډلې پر غاړه نه ده اخیستې. خو امنیتي ځواکونو د تحریک طالبان پاکستان (TTP) ډلې ته ګوته نیولې، چې په هیواد کې د څو وسله والو ډلو یو ایتلاف دی او له ډیرې مودې راهیسې په بنو او د شمالي وزیرستان په ګډون په شاوخوا سیمو کې فعالیت کوي.
د پاکستان لومړي وزیر شهباز شریف په یوه اعلامیه کې دا برید غندلی او چارواکو ته یې لارښوونه کړې چې د عاملینو د محاکمې لپاره له ټولو ممکنه امکاناتو کار واخلي.
