جرمني له پاکستان څخه تر ۵۰۰ ډېر بند پاتې افغانان مني

جرمني له پاکستان څخه تر ۵۰۰ ډېر بند پاتې افغانان مني

د جرمني حکومت د پنجشنبې په ورځ وویل چې ۵۳۵ هغه افغانان به ومني چې په جرمني کې د پناه ورکولو ژمنه ورسره شوې وه، خو په پاکستان کې په بې برخلیکه حالت کې پاتې دي.

د کورنیو چارو وزیر الکساندر دوبرینت د RND رسنیزې شبکې ته ویلي چې برلین غواړي د دغو قضیو د څېړلو بهیر "تر ممکنه حده د ډسمبر په میاشت کې" بشپړ کړي، ترڅو دوی وکولای شي جرمني ته ننوځي.

دا افغانان د جرمني د پخواني حکومت لخوا د کډوالو منلو د یوه پروګرام له مخې منل شوي وو، خو له کله چې د مې په میاشت کې محافظه کار لومړي وزیر فریدریش میرز واک ته ورسېد او دا پروګرام یې وځنډاوه، دوی په پاکستان کې بند پاتې دي.

په دې پروګرام کې شامل کسان یا هغه دي چې په افغانستان کې یې د طالبانو پر وړاندې جګړه کې د آلمان له وسله والو ځواکونو سره کار کړی، او یا هغه کسان دي چې په ۲۰۲۱ کال کې واک ته د طالبانو له بېرته راستنېدو وروسته له ځانګړي ګواښ سره مخ بلل شوي وو – لکه د بشري حقونو فعالان، خبریالان او د هغوی کورنۍ.

پاکستان د دغو افغانانو د قضیو د حل لپاره د کال تر پایه مهلت ټاکلی و، چې له هغې وروسته به دوی بېرته خپل هېواد ته شړل کېدل.

دوبرینت وویل: "موږ په دې اړه د پاکستان له چارواکو سره په اړیکه کې یو،" او زیاته یې کړه: "کیدای شي ځینې داسې قضیې هم وي چې موږ به یې په نوي کال کې وڅېړو."

تېره اونۍ، د کورنیو چارو وزارت ویلي وو چې په دې پروګرام کې شامل ۶۵۰ کسانو ته یې خبر ورکړی چې دوی به ونه منل شي، ځکه نوي حکومت دا کار نور د جرمني په "ګټه" نه بولي.

حکومت په پاکستان کې پاتې کسانو ته د پیسو وړاندیز کړی ترڅو په جرمني کې د مېشت کېدو له خپلې ادعا لاس واخلي، خو د نومبر میاشتې تر نیمایي پورې یوازې ۶۲ کسانو دا وړاندیز منلی دی.

د دې میاشتې په پیل کې، په جرمني کې د بخښنې نړیوال سازمان (Amnesty International)، د ماشومانو ژغورنې ادارې (Save the Children) او د بشري حقونو د څار سازمان (Human Rights Watch) په ګډون تر ۲۵۰ ډېرو سازمانونو ویلي وو چې د دې پروګرام شاوخوا ۱۸۰۰ افغانان په پاکستان کې په بې برخلیکه حالت کې دي او پر حکومت یې غږ وکړ چې هغوی ته د ورتګ اجازه ورکړي.