د تایلینډ او کمبوډیا د سرحدي نښتو په ۱۸مه ورځ د مړو شمېر ۹۶ ته ورسېده
وروسته له هغه چې دواړو هېوادونو د چهارشنبې په ورځ خبرې پیل کړې تمه ده چې پوځي خبرې اترې د اوونۍ تر پایه دوام ومومي.
د تایلینډ او کمبوډیا ترمنځ د سرحدي نښتو له امله د مړو شمېر د پنجشنبې په ورځ، د وروستۍ شخړې په ۱۸مه ورځ ۹۶ ته لوړ شو.
د دولتي اژانس کمپوچیا پرېس د راپور له مخې، د کمبودیا د دفاع وزارت وویل چې د پنجشنبې په سهار د تایلنډ پوځ د بانټې مېنچې ولایت په یوه کلي کې د توپخانې بریدونه ترسره کړل، چې له امله یې یو کمبودیايي ملکي وګړی ووژل شو.
د خبري اژانس د راپور له مخې، د کمبودیا ملي شورا یوه قوي اعلامیه خپره کړه او هغه څه یې وغندل چې د تایلنډ «بې رحمانه او غیرانساني یرغل» یې وباله.
د تایلینډ د نیشن ورځپاڼې په وینا، د تایلنډ پوځ وویل چې کمبودیا د BM-21 توغندي د تایلنډ د سا کایو ولایت په یوه کلي وویشتل، چې ملکي زیربناوو ته یې پراخه زیان واړاوه.
تایلنډي چارواکو وویل چې په جګړه کې ۲۳ تایلنډي سرتېري او یو ملکي وګړی وژل شوي، او زیاته یې کړه چې ۴۱ نور ملکي کسان د «ناڅاپي اغېزو» له امله مړه شوي دي.
د کمبودیا د کورنیو چارو وزارت وویل چې ۳۱ کمبودیايي ملکي وګړي وژل شوي دي.
له هغه راهیسې چې د دسمبر پر ۸مه بیا نښتې پیل شوې، نږدې یو میلیون کسان په دواړو غاړو کې بې ځایه شوي دي.
د کمبودیا د کورنیو چارو وزارت د «اژانس کمپوچیا پرېس» د راپور له مخې وویل چې د روانو نښتو له امله له هېواده نږدې ۶۱۰ زره کسان بېځایه شوي دي.
اوس مهال، د دفاع او بهرنیو چارو وزارتونو په وینا، له تایلنډي اړخه تر ۱۵۰ زره ډېر کسان لا هم بې ځایه دي، په داسې حال کې چې پوځ تر دې وړاندې راپور ورکړی و چې شاوخوا ۴۰۰ زره کسان بې ځایه شوي وو.
د «تایلنډ اېنکوایرر» خبري وېب سایټ د راپور له مخې، تمه ده چې د تایلنډ او کمبودیا تر منځ پوځي خبرې اترې د اوونۍ تر پایه دوام ومومي، وروسته له هغه چې دواړو هېوادونو د چهارشنبې په ورځ د تایلنډ په چنتابوري ولایت کې خبرې پیل کړې.
دواړه لوري به د شنبې په ورځ د پولې د عمومي کمېټې بشپړه غونډه ترسره کړي، چې د دواړو هېوادونو د دفاع وزیران به یې مشري کوي.
که چېرې دغه خبرې پر مهمو تخنیکي چوکاټونو هوکړې ته ونه رسېږي، بنکاک ویلي چې نه به دغه غونډه پرمخ وړي او نه به کوم تړون لاسلیک کړي.
