حماس پر اسرائیل د غزې اوربند ته د درناوي لپاره د نړیوال فشار غوښتنه کړې

حماس له نړیوالو فعالانو غوښتي چې پر اسرائیل فشار راوړي ترڅو د غزې اوربند ته درناوی وکړي، او ویلي یې دي چې له ګڼو ننګونو سره سره، د اسرائیلي یرغمل شویو د پاتې شونو (جسدونو) سپارلو لپاره کار کوي.
دغې ډلې د اکتوبر د ۱۰مې نېټې د پړاویز اوربند تړون له مخې، د نږدې دوه زره فلسطیني بندیانو په بدل کې ۲۰ ژوندي یرغمل او ۱۳ جسدونه خوشې کړي دي.
حماس پر اسرائیل تور لګولی چې د یرغمل شویو پر ځایونو یې بمباري کړې او له مرستو څخه د سیاسي فشار د وسیلې په توګه کار اخلي.
د اسرائیل له خوا له اوربند څخه پرله پسې سرغړونو کې نږدې ۱۰۰ فلسطینیان وژل شوي او لږ تر لږه ۲۳۰ نور ټپیان شوي دي، دا په داسې حال کې ده چې د ۲۰۲۳ کال له اکتوبر میاشتې راهیسې په غزه کې د وژل شویو شمېر تر ۶۸،۲۰۰ او د ټپیانو شمېر تر ۱۷۰،۰۰۰ اوښتی دی.