مکرون ټینګار کوي چې د ټرمپ او پوتین په هر ډول خبرو کې باید اوکراین او اروپا هم شامل وي

د فرانسې ولسمشر ایمانویل مکرون ویلي، که د امریکا ولسمشر ډونالډ ټرمپ او د روسیې ولسمشر ولادیمیر پوتین په بوداپست کې سره وګوري، نو اوکراینیان او اروپایان "باید د خبرو پر مېز موجود وي".
په سلووینیا کې د اروپايي ټولنې او مدیترانې هېوادونو تر سرمشریزې وروسته په خبرو کې، مکرون دا احتمالي لیدنه "یو ډېر ښه کار" وباله، خو ټینګار یې وکړ هغه کسان چې د اوکراین او اروپا د امنیت په اړه له پرېکړو اغېزمن کېږي، باید په دې خبرو کې شامل وي.
هغه له اوکراین څخه د فرانسې د "پیاوړي او دوامداره" ملاتړ ډاډ بیاځلي ورکړ او ټینګار یې وکړ چې هر ډول سوله باید له نړیوالو قوانینو سره سمه وي.
مکرون په لندن کې له ولسمشر ولادیمیر زلنسکي سره د مرستو او همکاریو د پرمختګ لپاره د "غوښتونکو ائتلاف" د یوې غونډې اعلان هم وکړ.
د هغه څرګندونې وروسته له هغې کېږي چې ټرمپ له زلنسکي غوښتي وو له مسکو سره یوه معامله وکړي، خو اوکراین دا وړاندیز رد کړی و.