د امریکا د بهرنیو چارو وزیر وايي چې که غوښتنه وشي، ټرمپ به سبا له علي خامنه يي سره وګوري.
د امریکا د بهرنیو چارو وزیر مارکو روبیو د شنبې په ورځ وویل، چې د امریکا ولسمشر ډونالډ ټرمپ له ایران سره د خبرو اترو له لارې د مسایلو هوارول غوره ګڼي.
روبیو له بلومبرګ سره په یوه مرکه کې وویل: "ولسمشر ویلي چې هغه له ایران سره معاملې ته رسېدل غوره ګڼي. دا کار ډېر سخت دی، خو هغه به یې هڅه وکړي. او دا هغه څه دي چې موږ یې همدا اوس د کولو هڅه کوو."
روبیو وویل چې دولتونه باید له یو بل سره تعامل ولري او زیاته یې کړه چې دی "د داسې یوه ولسمشر تر مشرۍ لاندې کار کوي چې له هرچا سره لیدو ته چمتو دی."
هغه زیاته کړه: "زه په پوره ډاډ سره ویلای شم چې که ایت الله (علي خامنه يي) سبا وغواړي چې له ولسمشر ټرمپ سره وګوري، ولسمشر به ورسره وګوري، نه د دې لپاره چې هغه له ایت الله سره موافق دی، بلکې د دې لپاره چې هغه فکر کوي په نړۍ کې ستونزې په همدې ډول حل کېږي."
منځني ختیځ ته د امریکا د دویمې الوتکې وړونکې بېړۍ د لېږلو په اړه د یوې پوښتنې په ځواب کې، روبیو وویل "هیڅکله به اجازه ورنه کړل شي" چې ایران اټومي وسلې ترلاسه کړي، او دا یې د امریکا، اروپا، سیمې او نړیوال امنیت لپاره یو ګواښ وباله.
هغه وویل: "موږ په څرګنده توګه غواړو په سیمه کې ځواکونه ولرو، ځکه ایران په سیمه کې د امریکا پر حضور د برید کولو وړتیا او لېوالتیا ښودلې ده." نوموړي یادونه وکړه چې واشنګټن په سیمه کې د خپلو متحدینو له امله اډې لري.
هغه وویل: "ایران په تېر کې ښودلې چې دوی پر موږ د برید کولو او یا زموږ اډو ته د ګواښ پېښولو لېوالتیا لري،" او امریکا باید "په سیمه کې کافي پوځي ځواک ولري ترڅو ډاډ ترلاسه کړي چې هغوی تېروتنه ونه کړي، پر موږ برید ونه کړي او د یوې لویې جګړې لامل نه شي."
