سره له دې چې د امریکا سنا مجلس د مولین ټاکنه تایید کړې ده، خو دیموکراتان ټینګار کوي تر هغه چې د ICE (د کډوالۍ او ګمرکونو اداره) او د سرحدي ګزمې پر فعالیتونو نوي محدودیتونه ونه لګول شي، د کورني امنیت وزارت د بودیجې له تصویبولو به ډډه وکړي.

د امریکا سنا مجلس د ۴۵ مخالفو رایو په مقابل کې په ۵۴ موافقو رایو سره مارکوین مولین (Markwayne Mullin) د کورني امنیت د نوي وزیر په توګه تایید کړ؛ مولین به د کریسټي نوم (Kristi Noem) پر ځای دغه دنده پر غاړه واخلي.

د امریکا د ولسمشر ډونالډ ټرمپ لخوا نومول شوي مولین د ډیری جمهوري غوښتونکو ملاتړ ترلاسه کړ. همدارنګه دیموکرات سناتورانو جان فیټرمن او مارټین هینریچ هم د مولین په ګټه رایه ورکړه.

مولین، چې د اوکلاهوما ایالت جمهوري غوښتونکی سناتور دی، په داسې حال کې د کورني امنیت وزارت مشرۍ ته رسیږي چې د حکومت بندښت شپږمې اونۍ ته داخل شوی او لا یې کومه حل لاره نه ده موندل شوې.

وروسته له هغه چې په مینیسوټا ایالت کې د کډوالۍ او ګمرکونو ادارې (ICE) د مامورینو لخوا د الکس پریټي او رېني نیکول ګوډ په نومونو دوه امریکايي اتباع ووژل شول، کریسټي نوم له دندې ګوښه شوې وه. دیموکراتانو چې د نوم د لیرې کېدو غوښتنه یې کوله، د هغې پر ضد یې د استیضاح او ګوښه کولو د پریکړې ملاتړ کړی و.

څرنګه چې دیموکراتان ټینګار کوي چې د دوی مخالفت د شخص پر سر نه، بلکې د پالیسۍ پر سر دی؛ له همدې امله تمه نه کیږي چې د مولین تایید به روان سیاسي بن بست حل کړي.

دیموکراتان د کډوالۍ ادارې (ICE) او د سرحدي ګزمې پر مامورینو د نویو محدودیتونو لګولو غوښتنه کوي. په دغو محدودیتونو کې د هویت کارتونو (ID) ځړول، د مخ پټونکو ماسکونو لرې کول او د شخصي ملکیتونو د تلاشۍ لپاره د قضايي حکم  ترلاسه کولو جبري کول شامل دي.