یوې سروې ښکاره کړې چې د غزې پر وړاندې د تل ابیب د نسل وژنې جګړې په دوام، د امریکا په عامه افکارو کې د فلسطینیانو په ګټه یو بنسټیز بدلون رامنځته کړی دی.
د ګالپ (Gallup) د یوې نوې سروې له مخې، پر غزه د تل ابیب د نسل وژنې له پیل وروسته، د لومړي ځل لپاره امریکایان له اسرائیلیانو څخه ډېر له فلسطینیانو سره خواخوږي ښيي.
د هغې سروې له مخې چې د جمعې په ورځ خپره شوه، ۴۱٪ امریکایان له فلسطینیانو او ۳۶٪ یې له اسرائیل سره خواخوږي لري؛ پاتې نورو یې یا بې پرېتوب ښودلی او یا یې هم د دواړو یا هیڅ لوري ملاتړ نه دی کړی. دا لومړی ځل دی چې له تېرو ۲۰ کلونو راهیسې په دغه ډول سروې ګانو کې اسرائیل تر فلسطینیانو شاته پاتې کېږي.
دا پایلې د تېر کال په پرتله یو لوی توپیر ښيي، ځکه تېر کال اسرائیل په ۴۶٪ سره د فلسطینیانو (۳۳٪) څخه مخکې و. په دې سروې کې هغه کسان چې په سیاسي لحاظ خپلواک (Independents) دي، د ۱۱ سلنې په توپیر د فلسطینیانو ملاتړ کړی دی.
د ډونالډ ټرمپ د جمهوري غوښتونکي ګوند غړي لا هم په ۷۰٪ سره د اسرائیل کلک ملاتړ کوي، که څه هم په تېره یوه لسیزه کې د دوی په ملاتړ کې هم ۱۰ سلنه کموالی راغلی دی. له بله لوري، د دیموکراتانو لیدلوری د اسرائیل په اړه په تېره لسیزه کې ورو ورو منفي شوی دی؛ په ځانګړې توګه وروسته له هغه چې بنیامین نتنیاهو له بارک اوباما سره د ایران په ډیپلوماسۍ کې مخالفت وکړ.
ځینې دیموکرات رایه ورکوونکي پر پخواني ولسمشر جو بایډن نیوکه کوي چې د ۲۰۲۳ کال د اکتوبر له ۷مې وروسته یې پر غزه د اسرائیل د بې رحمه جګړې په کابو کولو کې کافي هڅه نه ده کړې. په وروستۍ سروې کې ۶۵٪ دیموکراتانو له فلسطینیانو او یوازې ۱۷٪ یې له اسرائیل سره خواخوږي ښودلې ده.
ګالپ دا سروې د فبرورۍ له ۲مې تر ۱۶مې پورې د ۱،۰۰۱ تنو امریکایانو سره د ټیلیفوني خبرو له لارې ترسره کړې ده.
