د تورکیې جمهوریت د بهرنیو چارو وزارت ویاند ویلي، په هغو هېوادونو کې چې تر بریدونو لاندې دي، د تورکي وګړو د ساتنې لپاره اړین تدابیر نیول شوي دي.

د تورکیې جمهوریت د بهرنیو چارو وزارت اعلان وکړ چې په منځني ختیځ کې په هغو هېوادونو کې چې د شنبې په ورځ پر ایران د امریکا او اسرائیل د ګډو بریدونو له امله اغېزمن شوي، خپلو وګړو ته د ډیپلوماټیکو استازولیو له لارې ملاتړ چمتو کوي.

د وزارت ویاند، اونجو کیچیلي  د جمعې په ورځ په اېکس (X) شبکه کې په یو پوسټ کې ویلي چې په هغو هېوادونو کې چې تر بریدونو لاندې دي، د تورکي وګړو د ساتنې لپاره ټول لازم اقدامات شوي دي.

کیچیلي ټینګار وکړ چې په بهر کې د تورکیې ډیپلوماټیکې استازولۍ ۲۴ ساعته د بېړنیو اړیکو له لارې خدمتونه وړاندې کوي او له وګړو یې وغوښتل چې په اړوندو هېوادونو کې د تورکیې د استازولیو خبرتیاوې په ځیر سره تعقیب کړي.

نوموړي وویل چې تورکي وګړي کولای شي له عراق، ایران، اسرائیل، لبنان، سعودي عربستان، سوریې، عمان او اردن څخه د بېلابېلو ترانسپورتي لارو له لارې ووځي او په دې هېوادونو کې ډیپلوماټیکې استازولۍ د خوندي سفر د تنظیم په اړه لارښوونې کوي.

کیچیلي څرګنده کړه چې له بحرین، قطر او کویټ څخه تورکیې ته مستقیمه هوايي الوتنه نشته او له متحده عربي اماراتو څخه تورکیې ته الوتنې یوازې په نادره او استثنايي مواردو کې ترسره کېږي.

هغه زیاته کړه چې له دغو څلورو هېوادونو څخه سعودي عربستان او عمان ته د بسونو له لارې د تورکي وګړو د لېږدولو هڅې روانې دي ترڅو له هغه ځایه تورکیې ته پرواز وکړي. خو د بسونو د سفرونو پیل د ځايي چارواکو له اجازې سره تړلی دی.

کیچیلي په سیمه کې د حالاتو چټک بدلون ته په اشارې سره، له تورکي وګړو وغوښتل چې د خپلو ډیپلوماټیکو استازولیو وروستۍ لارښوونې تعقیب کړي.

دا څرګندونې په داسې حال کې کېږي چې له تېرې شنبې راهیسې پر ایران د اسرائیل او امریکا بریدونه دوام لري، چې د راپورونو له مخې د مذهبي مشر علي خامنه اي او لوړپوړو پوځي چارواکو په ګډون له ۱۰۰۰ څخه ډېر کسان پکې وژل شوي دي.

ایران هم په ځواب کې پر اسرائیل او د فارس خلیج پر هغو هېوادونو چې د امریکايي ځواکونو کوربه توب کوي، د ډرون او توغندیو بریدونه کړي دي.