دا څرګندونې په داسې حال کې کېږي چې ایران او امریکا په عمان کې خپلو مذاکراتو ته دوام ورکوي او انقره له دواړو خواوو سره په اړیکه کې ده ترڅو د سیمه ییزې جګړې مخنیوی وکړي.

د تورکیې د بهرنیو چارو وزیر هاکان فیدان ویلي دي چې د ایران په وړاندې هوایي بریدونه به د دغه هېواد د حکومت د سقوط لامل نه شي او هغه ادعاوې یې رد کړې چې ګواکې نظامي اقدام کولی شي نظام بدل کړي.

فیدان د دوشنبې په ورځ له خصوصي تلویزیون سره  په ژوندۍ مرکه کې د دې پوښتنې په ځواب کې چې ایا د نسکورولو په هدف د بریدونو په صورت کې به د ایران حکومت را وپرځېږي؟ وویل: "نه، حکومت به سقوط ونه کړي."

هغه زیاته کړه: "زه نه غواړم د ایران په اړه د ځانګړو سناریوګانو اټکل وکړم، خو نظام د هوایي برید له لارې نه بدلېږي. دا یو 'خوب او خیال' دی."

فیدان وویل چې که څه هم نظامي اقدام ممکن دولت کمزوری کړي، خو دا به د نظام د بدلون لامل نه شي. هغه وویل: "هغه څه چې کېدی شي، دا دي چې حکومت او سیسټم کمزوری شي او خلکو ته د خدماتو وړاندې کولو وړتیا له لاسه ورکړي. په هغه صورت کې، شته نظام ممکن ډیرې 'راډیکالي پریکړې' غوره کړي او شاید هڅه وکړي چې وضعیت سم کړي؛ یعنی خپل ځان ته بدلون ورکړي."

د انقرې ډیپلوماټیک هڅې:

د هغه دا څرګندونې په داسې حال کې مخې ته راځي چې ایران او متحده ایالات د مذاکراتو بل پړاو ته چمتووالی نیسي، کوم چې له نږدې اتو میاشتو ځنډ وروسته د جمعې په ورځ په عمان کې بیا پیل شول.

فیدان په دې خبرې ټینګار وکړ چې سیمه د بلې جګړې زغم نه لري او زیاته یې کړه: "زموږ ولسمشر رجب طیب اردوغان هم په دې برخه کې خورا حساس دی. له همدې امله موږ غواړو له ټولو ممکنه لارو کار واخلو ترڅو د احتمالي جګړې مخه ونیسو."

فیدان وویل چې د ایران د بهرنیو چارو وزیر عباس عراقچي ورته د خبرو اترو په اړه معلومات ورکړي او یادونه یې وکړه چې انقره د امریکا له لوري سره هم په اړیکه کې پاتې شوې ده. هغه که څه هم وضعیت داسې وباله چې "په چټکۍ حل کول یې ستونزمن دي"، خو ټینګار یې وکړ چې د دواړو خواوو ترمنځ د خبرو دوام ته روښانه لېوالتیا شتون لري.

هغه زیاته کړه: "اوس مهال د جګړې کوم سمدستي ګواښ نه لیدل کېږي" او و یې ویل چې د مذاکراتو دروازه خلاصه شوې ده.