د تورکیې صادرات د می په میاشت کې د تیر کال په پرتله ۲.۷ سلنه زیات شوي او د ۲۴.۸ میلیارد ډالرو په ارزښت یې نوی میاشتنی ریکارډ جوړ کړ. دا خبره د تورکیې د سوداګرۍ وزیر عمر بولات د دوشنبې په ورځ وکړه.
عمر بولات په استانبول کې یوې خبري غونډې ته وویل: "زموږ صادرات د کمزورې طلب او سختې سیالۍ سره سره مخ په زیاتېدو دي."
د میاشتني کچې له مخې، صادرات د اپریل په میاشت کې ۲۰.۸ میلیارد ډالرو رسیدلي او ۱۹.۴ سلنه زیات شوي دي.
د تورکیې واردات هم د می په میاشت کې د تیر کال په پرتله ۲.۱ سلنه زیات شوي او ۳۱.۳ میلیارد ډالرو ته رسېدلي دي.
د تورکیې د بهرني تجارت بیلانس د تیرې میاشتې لپاره ۶.۵ میلیارد ډالره کسر ثبت کړی، چې د ۲۰۲۴ کال د می په پرتله ۰.۱ سلنه زیاتوالی ښیي، خو د تیرې میاشتې په پرتله ۴۶ سلنه کم شوی دی.
د ۲۰۲۵ کال د لومړیو پنځو میاشتو په جریان کې، صادرات ۱۱۰.۹ میلیارد ډالرو ته رسېدلي، چې د تیر کال د همدې مودې په پرتله ۳.۵ سلنه زیاتوالی ښیي، په داسې حال کې چې واردات ۱۵۲ میلیارد ډالرو ته رسېدلي، چې ۵.۷ سلنه زیاتوالی ښیي.
په تېرو ۱۲ میاشتو کې، صادرات د ۲۶۵.۵ میلیارد ډالرو په ارزښت خپل تر ټولو لوړ حد ته رسېدلي، چې د تیرې مودې په پرتله ۱.۹ سلنه زیاتوالی ښیي، په داسې حال کې چې واردات ۳۵۲.۲ میلیارد ډالرو ته رسېدلي، چې ۱.۴ سلنه زیاتوالی ښیي.
د می په میاشت کې، د تورکیې زیاتره صادرات جرمني ته شوي، چې ۸.۳ سلنه برخه یې درلوده، ورپسې برېتانیا ۶.۲ سلنه، امریکا ۶ سلنه او ایټالیا ۵ سلنه برخه درلودله.
