د روسیې د بهرنیو چارووزیر سرګي لاوروف وایي، ټرمپ اوکراین او اروپا په خپلو ځایونو کینولي دي، خو دا حرکت د دې لامل نه کېږي چې وضعیت ته په "جوش او جذبه" وکتل شي.

د روسیې د بهرنیو چارو وزیر سرګي لاوروف د سه شنبې په ورځ وویل چې د اروپا او اوکراین پر وړاندې د امریکا د ولسمشر ډونالډ ټرمپ فشارونو ته د خوشبینۍ کوم دلیل نشته، ځکه په اوکراین کې د سولې په اړه خبرو اترو کې لا هم اوږده لاره پاتې ده. د روسیې خبري اژانس (RIA) د لاوروف له قوله لیکلي: "لا هم اوږده لاره په مخکې ده."

لاوروف وویل چې ټرمپ اوکراین او اروپا په خپلو ځایونو کینولي دي، خو دغه ګام باید د وضعیت په اړه د یوې "پر جوشه انګیرنې" لامل نه شي. د روسیې د بهرنیو چارو د وزیر مرستیال الکساندر ګروشکو د (Izvestia) خبري اژانس ته وویل، هر ډول هوکړه باید په ناټو کې د اوکراین غړیتوب رد کړي او په اوکراین کې د بهرنیو ځواکونو ځای پر ځای کول منع کړي.

تر اوسه کومه هوکړه نه ده شوې:

امریکا متحده ایالاتو د روسیې او اوکراین ترمنځ د جګړې د پای ته رسولو لپاره د بېلابېلو پلانونو پر مسودو منځګړیتوب کړی دی، خو د جګړې د ختمولو په اړه د ټرمپ له پرله پسې ژمنو سره سره تر اوسه کومه هوکړه نه ده شوې.

په دې بحثونو کې بنسټیزه موضوع دا ده چې له دویمې نړیوالې جګړې وروسته په اروپا کې تر ټولو خونړۍ جګړه څنګه پای ته ورسول شي، د اوکراین راتلونکی به څه وي، اروپايي قدرتونه به تر کومه حده څنډې ته کېږي او ایا هغه سوله چې امریکا یې منځګړیتوب کوي، پایښت لرونکې ده که نه.

روسیې د ۲۰۲۲ کال په فبروري کې پر اوکراین جګړه پیل کړه، چې دا د سړې جګړې له دورې راهیسې د مسکو او لوېدیځ ترمنځ تر ټولو لویه مقابله ده.