د ټرمپ د کډوالو ضد هڅو په ترڅ کې تر سلو زرو ډېرې امریکايي ویزې لغوه شوې
د امریکا د بهرنیو چارو وزارت وايي، ولسمشر ډونالډ ټرمپ دندې ته له راستنېدو راهیسې د ویزو د لغوه کولو شمېر د تېر کال په پرتله دوه چنده ډېر دی.
د امریکا د بهرنیو چارو وزارت وویل، متحده ایالاتو وروسته له هغه چې ولسمشر ډونالډ ټرمپ د کډوالو ضد تګلارې سره واک ته ورسېد، تر ۱۰۰،۰۰۰ ډېرې ویزې لغوه کړې دي، چې دا په یوه کال کې یو ریکارډ دی.
د امریکا بهرنیو چارو وزارت ویاند ټامي پیګوټ د دوشنبې په ورځ وویل: «د ټرمپ اداره د امریکايي وګړو له ساتنې او د امریکا د حاکمیت له ساتلو پرته بل لوړ لومړیتوب نه لري.»
د ۲۰۲۵ کال د جنورۍ له ۲۰مې راهیسې، د ټرمپ د دویم ځل لوړې کولو وروسته، دا شمېر په ۲۰۲۴ کال کې د لغوه شویو ویزو په پرتله دوه نیم چنده ډېر دی، کله چې جو بایډن ولسمشر و.
د بهرنیو چارو وزارت وویل چې "په زرګونو" ویزې د جرمونو له امله لغوه شوې دي، چې په کې برید او په نشه يي حالت کې موټر چلول هم شاملېدای شي.
د بهرنیو چارو وزیر مارکو روبیو په ویاړ سره د هغو محصلینو د ویزو لغوه کول په ګوته کړي چې د اسرائیلو پر ضد یې لاریونونه کړي وو.
روبیو د مک کارتي دورې یو قانون کارولی چې متحده ایالاتو ته اجازه ورکوي د هغو بهرنیانو د ننوتلو مخه ونیسي چې د امریکا د بهرنۍ تګلارې مخالف ګڼل کېږي، که څه هم د هغه ځینو مشهورو قضیو په محکمه کې د شړلو امرونه په بریالیتوب سره ننګولي دي.
د بهرنیو چارو وزارت وویل چې له لغوه شویو ویزو څخه ۸،۰۰۰ یې د محصلینو وې.
د ټرمپ ادارې د ویزو لپاره څېړنې هم سختې کړې دي، په شمول د لیدونکو د ټولنیزو رسنیو د پوسټونو څارل.
د ویزو لغوه کول د ډله ییزو شړلو د یوه پراخ کمپاین برخه ده، چې د فدرالي مامورینو د شمېر په زیاتولو سره په ډېر شدت ترسره کېږي.
د کورني امنیت وزارت تېره میاشت وویل چې د ټرمپ ادارې تر ۶۰۵،۰۰۰ ډېر کسان شړلي، او ۲.۵ میلیونه نور په خپله خوښه وتلي دي.
