د تاجکستان-افغانستان پر پوله برید کې درې چینايي وګړي ووژل شول
په دوشنبه کې د چین سفارت د جمعې په ورځ وویل، چې په تاجکستان کې د منځنۍ اسیا د دغه هېواد له افغانستان سره پر پوله په یوه وسله وال برید کې درې چینايي وګړي وژل شوي دي.
سفارت په یوه اعلامیه کې ویلي، چې په دې برید کې یو بل چینايي وګړی ټپي شوی هم دی. دا برید د چهارشنبې په ماښام د تاجکستان په سوېل لوېدیځ ختلان ولایت کې شوی دی. سفارت له خپلو وګړو غوښتي چې له سرحدي سیمې څخه ووځي.
سفارت دا نه دي ویلي چې د برید تر شا څوک وو، خو ویلي یې دي چې چین له تاجکستان څخه د پېښې د څېړلو غوښتنه کړې ده.
د تاجکستان د بهرنیو چارو وزارت د پنجشنبې په ورځ په یوه اعلامیه کې وویل چې دا برید د "LLC شاهین SM" پر شرکت شوی او له افغانستان څخه د لاسي بمونو په سمبال بې پیلوټه الوتکې په وسیله ترسره شوی دی. په اعلامیه کې راغلي چې وژل شوي درې واړه کسان د همدغه شرکت کارکوونکي وو.
په کابل کې چارواکو تر اوسه په دې اړه سمدستي غبرګون نه دی ښودلی.
