د پاکستان د بلوچستان ایالت په مستونګ سیمه کې پر یوه مسافر وړونکي رېلګاډي بمي چاودنه شوې ده.
د ډان ورځپاڼې د راپور له مخې، د رېل پټلۍ چارواکو وویل چې د پېښور او کوټې ترمنځ د جعفر اکسپریس مسافر وړونکی رېلګاډی د بمي چاودنې هدف ګرځېدلی دی.
د رېل پټلۍ چارواکو وویل چې د مستونګ په سیمه کې په پټلۍ کې ځای پر ځای شوي چاودیدونکي توکي چاودنه کړې، چې په پایله کې یې د رېلګاډي ۶ واګونونه له پټلۍ څخه وتلي دي، او یو واګون چپه شوی، چې له امله یې ۱۲ مسافر ټپیان شوي دي.
د چاودنې وروسته، امنیتي ځواکونه سیمې ته ولېږدول شول او ټپیان نږدې روغتونونو ته انتقال شول.
د رېل پټلۍ چارواکو ټینګار وکړ چې د برید پر مهال په رېلګاډي کې ۲۷۰ مسافر وو، او ویې ویل چې زیانمنه شوې پټلۍ به د امنیتي څیړنو وروسته ترمیم شي او بیا به د رېلګاډي خدمات پیل شي.
په پاکستان کې وسله وال بریدونه په ځانګړې توګه د افغانستان په پوله پرتو خیبر پښتونخوا او بلوچستان ایالتونو کې ډیر شوي دي.
په دواړو ایالتونو کې وسله والې ډلې چې د پښتنو او بلوڅو توکمیزو ډلو د حقونو د دفاع ادعا کوي، پر پاکستانیو امنیتي ځواکونو بریدونه کوي.
اسلام اباد ادعا کوي چې تحریک طالبان پاکستان په افغانستان کې ځای پر ځای شوي او له هغه ځایه خپل بریدونه تنظیموي، خو د افغانستان حکومت دا ادعاوې ردوي.
په بلوچستان کې بیا د بلوچستان د ازادۍ پوځ بریدونو په سر کې ځای لري.
د بلوچستان د ازادۍ پوځ په نامه دا بیلتون غوښتونکې ډله غواړي چې د بلوچستان ایالت له پاکستان څخه جلا شي او بلوڅ ولس پر دغې سیمې واکمني وکړي.
