اردوغان: اسرائیل پر جعلي پلمو د غزې اوربند ماتوي
د تورکیې ولسمشر وايي، حماس د اسرائیلي لمسونو سره سره اوربند ته ژمن دی او پر نړیوالو رسنیو یې په غزه کې د سلګونو خبریالانو د وژنې د له پامه غورځولو له امله نیوکه وکړه.

د تورکیې ولسمشر رجب طیب اردوغان د شنبې په ورځ وویل، اسرائیل په بیا بیا پر "جعلي" پلمو د غزې اوربند مات کړی دی او خبرداری یې ورکړ چې دا ډول کړنې د دې نازک اوربند د ساتلو هڅې کمزورې کوي.

اردوغان د شنبې په ورځ په استانبول کې د ساینس د خپرولو جایزو په مراسمو کې د وینا پر مهال وویل، حماس د اسرائیلي پرله‌پسې لمسونو سره سره "په صبر" خپلو ژمنو ته دوام ورکوي.

اردوغان همدارنګه پر نړیوالو رسنیو په غزه کې د خپلو همکارانو د مړینې په اړه د مناسب راپور په نه ورکولو سخته نیوکه وکړه.

هغه وویل: "په غزه کې تر ۲۷۰ ډېر خبریالان وژل شوي، خو لویې نړیوالې رسنۍ غلې پاتې دي."
"له فلسطیني خلکو سره د پیوستون نړیواله ورځ"

د هغه دا څرګندونې په داسې حال کې وشوې چې تورکیې له فلسطیني خلکو سره د پیوستون نړیواله ورځ لمانځله، او انقرې د فلسطینیانو له حقونو او دولت لرلو څخه خپل "نه ماتېدونکی ملاتړ" یو ځل بیا تکرار کړ.

اردوغان وویل، د اسرائیل د نسل وژنې له پامه غورځول به له هغوی سره د مرستې او ملاتړ په مانا وي.

"په غزه کې د اسرائیل د نسل وژنې له پامه غورځول یا پرې غلي پاتې کېدل به له هغوی سره د مرستې او ملاتړ په مانا وي."

اردوغان په دې اړه د انقرې اوږدمهاله دریځ په بیا تکرارولو سره وویل: "موږ د فلسطین د قضیې په اړه هېڅکله غلي نه یو پاتې شوي او هېڅکله به غلي پاتې نه شو."

د ژمي په رارسېدو سره، اردوغان وویل چې ترکیه غزې ته د بشري مرستو رسولو لپاره خپلې هڅې ګړندۍ کوي.

هغه ټینګار وکړ چې انقره "د اوربند ساتلو او بشري مرستو برابرولو لپاره" کار کوي او زیاته یې کړه چې دا دواړه ګامونه د اوږدمهاله ثبات د هر ډول امکان لپاره خورا مهم دي.

اردوغان د دوه دولتي حل لارې په اړه خپله ژمنتیا یو ځل بیا څرګنده کړه او ویې ویل، ترکیه به په کلکه خپلې پالیسۍ ته تر هغه وخته دوام ورکړي، چې د ۱۹۶۷ کال د پولو پر بنسټ یو ازاد، خپلواک او مستقل فلسطیني دولت جوړ شي چې پلازمېنه یې ختیځ بیت المقدس وي.