چین د دوشنبې په ورځ له پاکستان او افغانستان څخه وغوښتل چې د خپلو مخ په زیاتیدونکو نښتو د پای ته رسولو لپاره بېرته خبرو اترو ته وګرځي. په تېرو دوو اونیو کې د دواړو لورو ترمنځ په نښتو کې لسګونه کسان وژل شوي دي.
د چین د بهرنیو چارو وزارت ویاند "لین جیان" په بیجینګ کې د یوې خبري غونډې پر مهال، له کابل او اسلام اباد څخه وغوښتل چې په روانو سرحدي نښتو کې له زغم څخه کار واخلي او هیله یې څرګنده کړه چې دواړه لوري به یو اوربند ته ورسیږي.
لین وویل: "افغانستان او پاکستان ګاونډیان دي او یو له بل څخه نشي جلا کیدای. موږ هیله لرو چې هغوی بېرته د مذاکراتو مېز ته راشي، ارامه پاتې شي او له زغمه کار واخلي."
هغه زیاته کړه چې د چین د بهرنیو چارو وزیر "وانګ یي" له خپلو پاکستاني او افغان سیالانو سره خبرې کړي او له دواړو خواوو یې غوښتي چې د نښتو د خپریدو مخه ونیسي. لین وویل چې بیجینګ چمتو دی د دواړو ګاونډیانو ترمنځ د سولې لپاره خپلو "فعالو هڅو" ته دوام ورکړي.
نوې مرګ ژوبله
بلخوا، افغانستان د دوشنبې په ورځ ادعا وکړه چې د پاکستاني ځواکونو لخوا د تېرې شپې په توپچي بریدونو کې دوه نور ملکي وګړي وژل شوي او څو تنه نور ټپیان دي.
د خوست د والي ویاند مستغفر ګربز طلوع نیوز ته ویلي چې پاکستاني پوځیانو شاوخوا نیمه شپه د خوست ولایت د ګربزو ولسوالۍ پر "ناري" کلي د هاوان بریدونه کړي، چې په ترڅ کې یې یوه ښځه او یو ماشوم وژل شوي دي.
دا ادعا یوه ورځ وروسته له هغه کیږي چې د پاکستان په باجوړ ایجنسۍ کې څلور وروڼه د افغانستان له لوري په یو برید کې ووژل شول. تر اوسه کابل او اسلام اباد د یو بل د وروستیو ادعاوو په اړه رسمي غبرګون نه دی ښودلی.
د نښتو شمېرې
د افغانستان او پاکستان اړیکې په تېرو اونیو کې وروسته له هغه خرابې شوې چې تېره میاشت سرحدي تاوتریخوالی زیات شو. د فبرورۍ له وروستیو راهیسې، په سرحدي نښتو کې د دواړو لورو ۱۰۶ کسان وژل شوي دي. په دې کې په پاکستان کې ۱۳ سرتېري او ۵ ملکي وګړي شامل دي. د کابل د چارواکو په وینا، په افغانستان کې ۱۳ سرتېري او ۷۵ ملکي وګړي وژل شوي دي.
د ملګرو ملتونو د معلوماتو له مخې، د فبرورۍ له ۲۶مې د مارچ تر ۵مې پورې په افغانستان کې ۱۸۵ ملکي کسانو ته مرګ ژوبله اوښتې چې ۵۶ یې مړه شوي دي.
د طالبانو د مشر د اختر پیغام
د دې ترڅنګ، د افغان طالبانو مشر مولوي هبت الله اخوندزاده د دوشنبې په ورځ د کوچني اختر په مناسبت په خپل پیغام کې وویل چې کابل "غواړي د اسلامي اصولو پر بنسټ له نورو هیوادونو سره ښې او ګټورې اړیکې ولري." هغه له ټولو لورو وغوښتل چې "د افغانستان د خلکو باورونو او ارزښتونو ته درناوی وکړي او زموږ په کورنیو چارو کې له مداخلې ډډه وکړي."
