سویلي کوریا او هند خپلو وګړو ته خبرداری ورکړی چې د کړکېچ د زیاتېدو او د متحده ایالاتو د احتمالي پوځي برید په اړه د اندېښنو له امله له ایرانه ووځي.

په ایران کې د سویلي کوریا سفارت د یکشنبې په ورځ په خپله ویبپاڼه کې په یوه امنیتي خبرتیا کې خبرداری ورکړ چې د هېواد امنیتي وضعیت په چټکۍ سره خرابېدلی شي. سفارت له خپلو وګړو وغوښتل چې د رسنیو خبرونه او د سفارت لارښوونې په دقت سره تعقیب کړي او د خپل شخصي خوندیتوب لپاره اضافي تدابیر ونیسي.

سفارت ویلي: "وروستیو رسنیو راپورونو د سیمه ییزو کړکېچونو چټک زیاتوالی په ګوته کړی او پر ایران د متحده ایالاتو د برید احتمال او د تهران لخوا د غبرګون خبرداریو ته یې اشاره کړې ده." دغه سفارت له هغو سویلي کوریایانو څخه چې په ایران کې دي، غوښتي چې که یې پاتې کېدل اړین نه وي، نو "هر څومره ژر چې کېږي" له هېواده ووځي. سفارت همدارنګه له هغو کسانو څخه چې ایران ته د سفر پلان لري، غوښتي چې خپل سفرونه لغوه یا وځنډوي.

په ورته وخت کې، په تهران کې د هند سفارت د دوشنبې په ورځ په خپله ایکس (پخواني ټویټر) پاڼه کې له هندي وګړو وغوښتل چې د سوداګریزو الوتنو په ګډون له هرې ممکنې لارې له ایرانه ووځي. سفارت د بېړنیو اړیکو شمېرې هم شریکې کړې دي ترڅو د اړتیا پر مهال له خپلو وګړو سره مرسته وکړي. د سربیا د بهرنیو چارو وزارت هم له خپلو اتباعو غوښتي چې په سیمه کې د خراب امنیتي وضعیت له امله ژر تر ژره له ایرانه ووځي.

دا خبرداري په داسې حال کې ورکول کېږي چې امریکا په منځني ختیځ کې خپل پوځي حضور زیات کړی دی. د "USS ابراهیم لینکن" بېړۍ او اضافي جنګي الوتکې سیمې ته رسېدلې دي. تېره پنجشنبه، ولسمشر ډونالډ ټرمپ د مذاکراتو لپاره له ۱۰ څخه تر ۱۵ ورځو پورې وخت ټاکلی و او ویلي یې و چې که پایله ورنکړي، نو پر پوځي انتخابونو به غور وکړي. ټاکل شوې چې دواړه لوري د پنجشنبې په ورځ د سویس په جنیوا کې د اټومي مسلو په اړه خبرې اترې وکړي.