د پنجشنبې په سهار وختي پر کییف د روسیې د توغندیو او ډرون بریدونو له امله لږ تر لږه ۱۰ تنه وژل شوي او لسګونه نور ژوبل دي. دا بریدونه وروسته له هغه وشول چې ولسمشر ولادیمیر زیلینسکي خبرداری ورکړی و چې مسکو د یوه "پراخ برید" تیاری نیسي.

د روسیې د دفاع وزارت ویلي چې دا "سخت برید" یې "د ملکي زیربناوو په وړاندې د کییف رژیم د ترهګریزو بریدونو په ځواب کې" ترسره کړی دی.

دا برید وروسته له هغه وشو چې د اوکراین هوايي ځواک خبرداری ورکړ چې بالیسټیک توغندي د پلازمینې په لور روان دي. زیلینسکي د چهارشنبې په ورځ د احتمالي برید د استخباراتي راپورونو له امله ډبلین ته خپل سفر نیمګړی پرېښود او هېواد ته راستون شو.

د فرانسې خبري اژانس (AFP) خبریالانو په مرکزي او ختیځ کییف کې د لسو څخه د زیاتو چاودنو غږونه اورېدلي او لیدلي یې دي چې خلک، چې ځینو یې ماشومان او اهلي حیوانات هم په غېږ کې وو، د میټرو سټیشنونو ته د پناه اخیستو لپاره منډې وهلې.

د اوکراین د بېړنیو خدمتونو ادارې ویلي چې په دې بریدونو کې ۱۰ تنه وژل شوي او ۳۴ نور ټپیان شوي دي. د کییف د نظامي ادارې مشر، تیمور تکاچینکو، روسیه تورنه کړه چې په قصدي ډول یې ملکیان او د استوګنې سیمې په نښه کړې دي.

کورونه او د محصلینو لیلیې زیانمنې شوې دي
د سیمه ییز والي، میکولا کلاشینک په وینا، د کییف په شاوخوا سیمو کې پنځه ولسوالۍ ویشتل شوې دي. کلاشینک په ټیلیګرام کې لیکلي: "د شپې په اوږدو کې، دښمن یو ځل بیا د کییف پر سیمه د برید کوونکو ډرون، بالیسټیک توغندیو او کروز توغندیو په واسطه پراخ برید وکړ." هغه وویل چې بېړنۍ ډلې په بوچا ولسوالۍ کې په ګودامونو او یو کور کې د اور وژنې په حال کې دي، په داسې حال کې چې د سیمې په نورو برخو کې کورونه، د محصلینو یوه لیلیه او وسایط زیانمن شوي دي.

یوې ۳۲ کلنې ډاکټرې، کترینه کوچیریاوا، AFP ته د پناه ځایونو د سخت حالت په اړه وویل: "دا سخته ده. زما ماشومه په بشپړې خاموشۍ او تیارې کې د خوب عادت لري. ما هغه راپورته کړه او لاندې مې راوړه. هغه ویښه شوه او اوس نه ویده کېږي. موږ هڅه کوو هغه بېرته ویده کړو، خو هغه وارخطا کېږي."

زیلینسکي د نورو بریدونو خبرداری ورکړ
زیلینسکي د چهارشنبې په ورځ ویلي و چې هغه د هغو استخباراتي راپورونو له امله له ډبلین څخه وختي راستون شوی چې ښيي روسیه د یوه لوی برید تیاری نیسي. هغه وویل: "زه پر خپلو خلکو غږ کوم چې په ځانګړي ډول محتاط واوسي، د خپل ځان، خپلو ماشومانو او کورنیو ساتنه وکړي؛ له پناه ځایونو کار واخلي او هوايي خبرداریو ته پام وکړي."

اوکراین هم په وروستیو اونیو کې د روسیې په داخل کې د انرژۍ زیربناوې او پوځي سایټونه په نښه کړي او خپل ډرون بریدونه یې زیات کړي دي.

د یوې نوې څېړنې (CSIS) له مخې، چې د چهارشنبې په ورځ خپره شوه، په اوکراین کې د روسیې جګړې تر اوسه له دوه ملیونو ډېر پوځي تلفات (مړي او ټپیان) اړولي، چې په وینا یې روسي ځواکونو تر ټولو ډېر زیان لیدلی دی.

د جګړې د پای ته رسولو لپاره د متحده ایالاتو په مشرۍ هڅې تر اوسه ناکامې شوې دي. زیلینسکي په اېکس (X) کې لیکلي: "د روسیې مشران په بشپړه توګه د جګړې له پای ته رسولو انکار کوي." هغه زیاته کړه چې که څه هم اوکراین په رسمي او غیر رسمي ډول مذاکراتو ته چمتووالی ښودلی، خو مسکو لا هم پر تېري ټینګار کوي.