امریکا ولسمشر وايي: "موږ باید هغوی بېرته هغه ځای ته واستوو له کومه ځایه چې راغلي دي — څومره چې ژر کېدای شي."
د امریکا ولسمشر ډونالډ ټرمپ د کانګرس د دوو ښځینه مسلمانو غړو د چټک ډیپورټ کولو غوښتنه کړې، وروسته له هغه چې د کانګرس استازو راشده طیب او الهان عمر د کانګرس د وینا پر مهال پر هغه چیغې کړې او د خبرو د ګډوډولو هڅه یې وکړه.
ټرمپ د چهارشنبې په ورځ په یوه اوږد ټولنیز پوسټ کې ولیکل: "کله چې خلک داسې چلند کولی شي، او دا چې موږ پوهېږو هغوی کږې (ناسمې) او فاسدې سیاستوالې دي او زموږ د هېواد لپاره ډېرې بدې دي، موږ باید دوی بېرته هغه ځای ته واستوو له کومه ځایه چې راغلي دي — څومره چې ژر کېدای شي."
که څه هم الهان عمر په سومالیا کې زېږېدلې، خو نږدې درې لسیزې کېږي چې د امریکا تابعیت لري. له بلې خوا، راشده طیب یوه فلسطینۍ الاصله امریکایۍ ده چې د میشیګان ایالت په ډیټرویټ کې زېږېدلې، پدې معنی چې هغه په خپل ټول ژوند کې د امریکا تبعه پاتې شوې ده. هیڅ یوه یې هم د قانون له مخې خپلو پلرنیو هېوادونو ته د لېږلو وړ نه ده.
دواړو ښځو د سه شنبې په ماښام د کانګرس په ګډه ناسته کې د ټرمپ د وینا پر مهال په وار وار پر هغه چیغې کړې او هغه یې د کډوالۍ د افسرانو په لاس د امریکایانو د مړینې له امله ملامت کړ.
