د افغانستان د حکومت ویاند ذبیح الله مجاهد د چهارشنبې په ورځ وویل، وروسته له هغه چې د پاکستان پوځ په دریو افغان ولایتونو کې هوايي بریدونه ترسره کړل، لږ تر لږه ۱۳ کسان وژل شوي چې ۱۱ یې ماشومان دي. دا د هغې شخړې نوې لړۍ ده چې سږ کال یې سلګونه کسان وژلي دي.
مجاهد زیاته کړه چې د کونړ، خوست او پکتیکا په ولایتونو کې د اسلاماباد په دغو بریدونو کې لږ تر لږه ۱۴ نور کسان ټپیان شوي چې ټول یې ماشومان او ښځې دي.
د پاکستان د پوځ یا حکومت له خوا په رسمي ډول سمدستي کومه تبصره نه ده شوې، خو امنیتي چارواکو رویټرز خبري اژانس ته ویلي چې اسلاماباد د هغو پاکستاني وسلهوالو پر پټنځایونو او نورو تاسیساتو بریدونه کړي چې له هغو څخه د پاکستان پر ضد کار اخیستل کېده.
اسلاماباد پر کابل تور پورې کړی چې هغو ترهګرو ته یې پناه ورکړې چې په پاکستان کې بریدونه پلانوي، خو طالبانو تل دا تورونه رد کړي دي.
د تاوتریخوالي دا نوې څپه د پاکستان او افغانستان ترمنځ په جګړه کې هغه اوږدمهاله کراري ګډوډوي چې له څه مودې راهیسې رامنځته شوې وه. دغو دواړو هېوادونو د تېرې فبرورۍ په میاشت کې په تېرو څو کلونو کې خپله تر ټولو سخته جګړه کړې وه.
دواړو هېوادونو د مارچ په میاشت کې پر یوې نازکې اوربند موافقه کړې وه، چې چین یې د هواري لپاره د منځګړیتوب هڅه کوله.
