روسیې تیره شپه د اوکراین پر وړاندې خپل تر ټولو لوی هوايي برید ترسره کړ. د اوکراین یو چارواکي ویلي، چې دا د بمبارۍ د هغه کمپاین برخه ده چې د درې کلنې جګړې د پای ته رسولو هڅې یې نورې هم له ستونزو سره مخ کړې دي.
د اوکراین هوايي ځواک ویلي چې روسیې ټولټال ۵۳۷ هوايي بریدونه پر اوکراین ترسره کړي دي، چې په دې کې ۴۷۷ د ډرونونو او ۶۰ توغنديو پر مټ شوي .
د اوکراین دفاعي ځواکونو ۲۴۹ ډرون او توغندي په نښه او له منځه وړي دي، او ۲۲۶ نور بیا ښایي د برقي خنډونو په نتیجه کې خپل هدف ته د رسیدو نه مخکې شنډ شوي وي.
د اوکراین د هوايي ځواک د اړیکو مشر یوري ایهنات د ایسوشیټډ پریس سره په خبرو کې وویل چې دغه شپېنۍ حمله د هېواد پر وړاندې "تر ټولو لوی هوايي برید" وه، چې په کې ډرونونه او د مختلفو ډولونو توغندي شامل وو.
دغه برید د اوکراین په بېلابېلو سیمو، په ځانګړې توګه د لوېدیځو سیمو په ګډون چې د جګړې له کرښې لرې دي، ترسره شوی دی.
د پولنډ هوايي ځواک ویلي چې د پولنډ او د هغې د متحدو هېوادونو الوتکې د پولنډ د هوايي حریم د خوندي ساتلو لپاره چمتو شوې وې.
د خرسون سیمه ییز والي اولیکساندر پروکودین ویلي چې په یوه ډرون برید کې یو کس وژل شوی دی.
په چیرکاسي سیمه کې شپږ کسان ټپیان شوي، چې په کې یو ماشوم هم شامل دی، د سیمې والي ایهور تابوریټس ویلي دي.
