د امریکا ولسمشر ډونالډ ټرمپ د اسرائیلو لخوا د ایران پر وړاندې د شپې هوايي بریدونه "عالي" بللي دي او زیاته یې کړه چې "نور هم په لاره دي".

ټرمپ د جمعې په ورځ د ABC نیوز سره په ټیلیفوني خبرو کې د دې بریدونو په اړه په ښکاره ډول د خوښۍ څرګندونه وکړه.

ټرمپ وویل: "زه فکر کوم چې دا بریدونه ډېر ښه وو. موږ هغوی ته یو چانس ورکړ، خو هغوی  ونه منله. هغوی سخت وځپل  شول، ډېر سخت. هغوی داسې ووهل شول چې تر دې سخت به څوک ونه وهل شي. او نور بریدونه هم په لاره دي، ډېر نور."

کله چې له ټرمپ څخه وپوښتل شول چې آیا امریکا په دې برید کې کومه برخه لرله، هغه له ځواب ورکولو ډډه وکړه او ویې ویل: "زه نه غواړم په دې اړه څه ووایم."

‘ایران باید معامله وکړي’

ټرمپ ایران ته خبرداری ورکړ چې "باید معامله وکړي، مخکې له دې چې هېڅ هم پاتې نه شي، او هغه څه وژغوري چې یو وخت د ایران امپراتورۍ په نوم پېژندل کېدل."

هغه په Truth Social کې ولیکل: "نور مرګونه نه، نور ویجاړی نه، یوازې معامله  وکړئ، مخکې له دې چې ناوخته شي."

ټرمپ وویل چې هغه ایران ته د ډیپلوماسۍ لپاره یو چانس ورکړ، خو زیاته یې کړه چې سره له دې چې "هغوی څومره نږدې شول، هغوی ونه توانېدل چې معامله وکړي."

هغه وویل چې هغه ایراني چارواکو ته ویلي وو چې وضعیت به "تر هغه څه ډېر خراب شي چې هغوی یې فکر کوي، تمه یې لري، یا ورته ویل شوي دي." هغه زیاته کړه چې امریکا "په نړۍ کې تر ټولو پرمختللې او ځواکمنې پوځي وسلې جوړوي" او اسرائیل "د دې ډېره برخه لري."