ملګري ملتونه: د سوډان د کوردوفان په مهم ښار کې د بريد له امله لږ تر لږه ۴۰ کسان وژل شوي دي
دا برید په داسې حال کې کیږي چې د چټک ملاتړ ځواکونو په ښار باندې د برید تیاری نیولی، او د اردو سرتیري هم د هغوی د شنډولو لپاره راټول شوي دي.
د ملګرو ملتونو د بشري چارو دفتر ویلي چې د سوډان د مرکزي کوردوفان سیمې په ال عبید ښار کې د جنازې په مراسمو برید کې ۴۰ کسان وژلي دي.
په اعلامیه کې نه ده روښانه شوې چې برید په کومه ورځ شوی او څوک یې مسؤل دي، خو دا برید په داسې وخت کې شوی چې د «چټک ملاتړ ځواکونه» (RSF) د ښار د نیولو لپاره د یرغل چمتووالی نیولی و، او د پوځ سرتېري هم د هغوی د مخنیوي لپاره راټول شوي وو.
د بشري چارو د همغږۍ دفتر د چهارشنبې په ورځ وویل چې "د کوردوفان په سیمه کې امنیتي وضعیت مخ په خرابیدو دی.
د کوردوفان درې ایالتونه - شمال، لویدیځ او سویل - په دې وروستیو کې د سوډاني پوځ او د چټک ملاتړ ځواکونو ملیشو ترمنځ د سختو نښتو شاهدان دي.
دغه ډلې د اکتوبر په ۲۶مه د شمالي دارفور د ایالت پلازمېنه «الفاشر» هم نیولې وو او د سیمه ییزو او نړیوالو ادارو د راپورونو له مخې، پر ملکي وګړو یې وحشیانه وژنې ترسره کړې، چې له امله یې دا اندېښنه پیدا شوې چې ښايي دا پرمختګ د جګړه ځپلي هېواد د جغرافیایي وېش بنسټ کېږدي.
له اپریل ۲۰۲۳ راهیسې، د سوډان پوځ او د چټک ملاتړ ځواکونه په کورنۍ جګړه کې ښکېل دي چې په ترڅ کې یې زرګونه کسان وژل شوي، میلیونونه بې کوره شوي او هېواد یې د نړۍ له تر ټولو ستر بشري ناورینونو سره مخ کړی دی.
