د اسرائیلو د لومړي وزیر له دفتر څخه په خپره شوې خبرپاڼه کې راغلي چې نتانیاهو په پلازمېنه تل ابیب کې د دفاع وزارت په مرکز "کریا" کې د دفاع له وزیر یسرائیل کاټز، د پوځ له لوی درستیز ایال زمیر او نورو قوماندانانو سره لیدلي دي.
نتانیاهو دلته په خپله وینا کې ادعا وکړه چې دوی د ایران ګواښ پر شا تمبولی او د تهران اداره "د لړزېدو په حال کې ده او له بل هر وخت څخه زیاته کمزورې شوې ده."
نتانیاهو وویل: "زموږ راتلونکی اصلي ماموریت د ایران د رژیم پرځول دي او موږ په دې برخه کې پر خپلو وړتیاوو باور لرو." هغه زیاته کړه چې دا هدف ناممکن نه دی، بلکې نږدې او ترلاسه کېدونکی دی.
نتانیاهو داسې ادعا هم وکړه چې ایران د اسرائیلو د ځواب (ویرې) له امله پر دوی برید نه دی کړی او په هېواد کې دننه یې پر خپل یووالي ټینګار وکړ.
دا په داسې حال کې ده چې په اسرائیلو کې د اکټوبر د ۲۷مې له ټاکنو وړاندې نظرپوښتنې ښيي چې د پخواني لوی درستیز ګادي ایزنکوټ په مشرۍ "یاشار ګوند" په ټاکنیزه سیالۍ کې مخکې دی.
نتانیاهو، چې په عامه نظرپوښتنو کې شاته پاتې شوی، په دې وروستیو کې خپلو ګواښونو ته زور ورکړی دی.
