د شمالي کوریا مشر کیم جونګ اون ښایي د هاګ په نړیوال جزایي محکمه کې د جنګي جرمونو د تحقیقاتو سره مخ شي، ځکه چې هغه د روسیې او اوکراین په جګړه کې د روسیې څخه ملاتړ کړی دی. دا څرګندونې د نړیوالې جزایي محکمې پخواني مشر سونګ سانګ هیون د دوشنبې په ورځ د سویلي کوریا په پلازمېنه سیول کې یوې غونډې ته وکړې.
تېره میاشت شمالي کوریا تایید کړه چې خپلو سرتېرو ته یې دنده سپارلې چې د روسیې په ملاتړ د اوکراین جګړه کې برخه واخلي. هم پیونګ یانګ او هم مسکو دواړو دا خبره تایید کړې چې د شمالي کوریا سرتېري د روسیې سره د اوکراین پر وړاندې جګړه کې مرسته کوي.
سونګ وویل، سره له دې چې کیم جونګ اون د شمالي کوریا د بشري حقونو د سرغړونو لپاره نړیوالې جزایي محکمې ته نه دی معرفي شوی، اوس قانوني بنسټونه شته چې اوکراین د هغه پر وړاندې قضیه پرانیزي.
هغه زیاته کړه: "اوس وخت مناسب دی چې کیم جونګ اون نړیوالې جزایي محکمې ته وړاندې شي." هغه وویل چې د روسیې سره د پیونګ یانګ پوځي ملاتړ اوکراین ته قانوني بنسټ ورکوي چې د شمالي کوریا پر وړاندې شکایت وکړي.
سونګ دا هم وویل چې که څه هم د اوکراین لخوا شکایت کول به غوره وي، نړیواله جزایي محکمه هم واک لري چې خپلواکه تحقیقات پیل کړي.
هغه نړیوالې جزایي محکمې ته غږ وکړ چې د شمالي کوریا د مشرتابه او د هغوی د متحدینو لخوا د احتمالي جنګي جرمونو پر وړاندې قوي اقدامات وکړي.
