د تورکیې د عامه اړیکو ریاست د سې شنبې په ورځ په یو بیان کې ویلي، ولسمشر اردوغان یادونه وکړه چې دا سفر د چناق کلا د جګړو له ۱۱۱مې کلیزې سره په یو وخت کې ترسره کېږي؛ هغه تاریخي پېښه چې د تورکیې او نیوزیلنډ په ګډه حافظه کې خورا ژور ځای لري او دا سفر له همدې امله ځانګړی اهمیت لري.

هغه وویل چې تورکیه غواړي له نیوزیلنډ سره خپلې اړیکې په ځانګړې توګه په سوداګرۍ، دفاعي صنایعو او ترانسپورت په برخو کې نورې هم پراخې کړي.

اردوغان همدارنګه د اسلاموفوبیا (اسلام سره دښمنۍ) په وړاندې د مبارزې په برخه کې د نیوزیلنډ پر اصولي دریځ خوښي څرګنده کړه او زیاته یې کړه چې په ملګرو ملتونو او دوه اړخیزه کچه د فلسطین له داعیې او د 'دوه هېوادیز حل' له لارې څخه د نیوزیلنډ ملاتړ د ستاینې وړ دی.

ولسمشر نیوزیلنډ ته د 'پاسیفیک ټاپوګانو د فورم' د سرمشریزې په کوربه توب کې، چې راتلونکی کال به ترسره شي، د بریالیتوب هیله وکړه.

اردوغان د زرغون بدلون (ګرین ټرانسفارمیشن)، د چاپیریال ساتنې او د اقلیمي بحران په وړاندې د مبارزې په برخه کې د تورکیې پرمختګونو ته په اشارې سره وویل، چې د ملګرو ملتونو د اقلیمي بدلون ۳۱م کنفرانس (COP31) به د نومبر په میاشت کې په انتالیا کې جوړ شي. هغه له ګورنر جنرال کیرو څخه وغوښتل چې په دغه سرمشریزه کې ګډون وکړي.

دا کتنه د بندو دروازو تر شا ترسره شوه. اردوغان د ماڼۍ په اصلي دروازه کې د مېرمن کیرو تود هرکلی وکړ او دواړو مشرانو د تورکیې او نیوزیلنډ د بیرغونو مخې ته یادګاري عکسونه واخیستل.